શું ટ્રમ્પ અને ઈરાનના રાષ્ટ્રપતિ વચ્ચે થશે સીધી મુલાકાત? ઈરાનની 7 શરતો સામે ટ્રમ્પે આપી 'દેશ તબાહ' કરવાની ચેતવણી

Trump Open to Meet Pezeshkian : છેલ્લા 7 મહિનાથી ચાલી રહેલા ભીષણ યુદ્ધ અને ભારે તણાવ વચ્ચે અમેરિકા અને ઈરાનના સંબંધોમાં એક મોટો વળાંક આવવાની તૈયારીમાં છે. અમેરિકન રાષ્ટ્રપતિ ડોનાલ્ડ ટ્રમ્પે સંકેત આપ્યા છે કે તેઓ ન્યૂયોર્કમાં સંયુક્ત રાષ્ટ્ર મહાસભાની બેઠક દરમિયાન ઈરાનના રાષ્ટ્રપતિ મસૂદ પેઝેશ્કિયન સાથે મુલાકાત કરવા માટે તૈયાર છે.

એક તરફ ઈરાને વાતચીત માટે અમેરિકા સામે 7 મોટી શરતો મૂકી છે, તો બીજી તરફ ઈરાની સેનાએ પણ ચીમકી આપી છે કે જો અમેરિકા કોઈ નવો હુમલો કરશે તો તેનો જડબાતોડ જવાબ આપવામાં આવશે. જાણો આ હાઈ-પ્રોફાઈલ મુલાકાત પાછળની સંપૂર્ણ કહાની.

ન્યૂયોર્કમાં કેવી રીતે થશે આ મહા મુલાકાત?

ન્યૂયોર્કમાં 22 થી 28 સપ્ટેમ્બર સુધી સંયુક્ત રાષ્ટ્ર મહાસભાની બેઠકો યોજાવા જઈ રહી છે. જેમાં ભાગ લેવા માટે દુનિયાભરના નેતાઓ પહોંચી રહ્યા છે. અમેરિકાએ ઈરાનના રાષ્ટ્રપતિ મસૂદ પેઝેશ્કિયન અને વિદેશ મંત્રી અબ્બાસ અરાઘચી સહિત આખા ઈરાની પ્રતિનિધિમંડળને અમેરિકા આવવાની મંજૂરી આપી દીધી છે. બંને દેશોના નેતાઓ એક જ છત નીચે હોવાથી, કોઈ મોટા શિખર સંમેલન વિના પણ 'સાઈડલાઈન્સ' પર સીધી વાતચીતનો રસ્તો ખુલી શકે છે.

ઈરાનની રાષ્ટ્રીય સુરક્ષા પરિષદના સચિવ મોહસીન રઝાઈના જણાવ્યા અનુસાર, કતાર, તુર્કી અને મધ્ય પૂર્વના અન્ય દેશો હાલમાં વચેટિયાની ભૂમિકા ભજવી રહ્યા છે. તેમના દ્વારા ઈરાને અમેરિકા સમક્ષ મુખ્ય 7 શરતો રાખી છે, જેમાં નીચેની બાબતો મુખ્ય છે.

તમામ મોરચે ચાલી રહેલા યુદ્ધને તાત્કાલિક ધોરણે અટકાવવામાં આવે.અમેરિકા દ્વારા ફ્રીઝ કરવામાં આવેલા ઈરાનના તમામ ફંડ અને સંપત્તિઓ તરત જ પાછી આપવામાં આવે.ઈરાન પર લગાવવામાં આવેલી અમેરિકન નૌકાદળની નાકાબંધી  દૂર કરવામાં આવે.

ટ્રમ્પની કડક ચેતવણી અને તેમની પાસે રહેલા 3 વિકલ્પો

અમેરિકન ન્યૂઝ ચેનલ ફોક્સ ન્યૂઝ સાથે વાત કરતા ડોનાલ્ડ ટ્રમ્પે સ્પષ્ટ કર્યું છે કે તેઓ અત્યારે 'નિર્ણાયક મોડ' માં છે અને આવનારા દિવસોમાં કંઈક મોટું થવાનું છે. હાલમાં ટ્રમ્પ પાસે 3 મુખ્ય રસ્તાઓ છે.

આર્થિક દબાણ: ઈરાન પર અત્યંત કડક આર્થિક પ્રતિબંધો ચાલુ રાખવા.

લશ્કરી કાર્યવાહી: અમેરિકા તરફથી ઈરાન પર સીધો સૈન્ય હુમલો કરવો.

ડિપ્લોમેટિક ડીલ: ટેબલ પર વાતચીત કરીને કોઈ કાયમી કરાર પર પહોંચવું.

પોતાના આક્રમક અંદાજ માટે જાણીતા ટ્રમ્પે ત્યાં સુધી કહી દીધું કે, "મારો સવાલ એ છે કે મારે આખા દેશને ક્યારે અને કેવી રીતે તબાહ કરવો છે? તેમના માટે એ જ સારું રહેશે કે તેઓ યોગ્ય રીતે વર્તન કરે."

અખાતી દેશો સાથે ટ્રમ્પની મિટિંગ

કોઈપણ મોટો નિર્ણય લેતા પહેલા ટ્રમ્પ ન્યૂયોર્કમાં સાઉદી અરેબિયા, UAE, કતાર, બહેરીન, કુવૈત અને ઓમાનના નેતાઓ સાથે પણ અલગથી બેઠક કરવાના છે. તેઓ યુદ્ધના આગામી તબક્કા વિશે પોતાના સહયોગીઓનો મત જાણવા માંગે છે. બીજી તરફ, ઈરાનના રાષ્ટ્રપતિ પેઝેશ્કિયનનું કહેવું છે કે ઈરાન યુદ્ધ નથી ઈચ્છતું, પરંતુ તેઓ કોઈની ધમકી કે તાકાત સામે ઝૂકશે પણ નહીં. ઈરાન પાસે 'સ્ટ્રેટ ઓફ હોર્મુઝ' દ્વારા કાચા તેલનો સપ્લાય રોકવાનું સૌથી મોટું હથિયાર છે.

આ પણ વાંચો-Bangladesh economic crisis: પડોશી દેશમાં ફ્યુઅલ પ્રાઇસમાં ભડકો, પેટ્રોલ-ડીઝલ અને કેરોસીનના ભાવ પહોંચ્યા આસમાને