ITR Filing Deadline: ITR ફાઇલિંગના નિયમોમાં મોટો ફેરફાર, હવે 31 જુલાઈ છેલ્લી તારીખ નથી, જાણો ITR ફોર્મ મુજબ તમારી નવી ડેડલાઇન

ITR Filing Deadline: જો તમે પણ દર વર્ષની જેમ એવું માનીને બેઠા છો કે ઇન્કમ ટેક્સ રિટર્ન ફાઇલ કરવાની છેલ્લી તારીખ 31 જુલાઈ જ છે, તો તમારે થોડું અપડેટ થવાની જરૂર છે. અસેસમેન્ટ યર 2026-27 (AY 2026-27) માટે ઇન્કમ ટેક્સ ડિપાર્ટમેન્ટે ડેડલાઇનમાં મોટો ફેરફાર કર્યો છે.

બજેટ 2026 માં કરવામાં આવેલા ફેરફારો બાદ હવે દરેક ટેક્સપેયર માટે એક સમાન ડેડલાઇન એટલે કે 31 જુલાઈ લાગુ પડશે નહીં. હવે તમારી ITR ફાઇલ કરવાની છેલ્લી તારીખ એ વાત પર નિર્ભર કરશે કે તમે કયું ITR ફોર્મ ભરો છો. ભારે પેનલ્ટી અને આર્થિક નુકસાનથી બચવા માટે ટેક્સ કેલેન્ડરમાં થયેલો આ ફેરફાર જાણવો ખૂબ જ જરૂરી છે.

ફોર્મ મુજબ અલગ-અલગ હશે ITR ડેડલાઇન

સરકારે નોકરીયાત વર્ગ અને બિઝનેસ/પ્રોફેશનલ વર્ગ માટે અલગ-અલગ ડેડલાઇન નક્કી કરી છે, જેની વિગતો નીચે મુજબ છે:

પગારદાર વર્ગ અને પેન્શનર્સ (ITR-1 અને ITR-2): જે લોકો પગારદાર છે, પેન્શન મેળવે છે અથવા જેમની આવક કેપિટલ ગેઇન્સ, વ્યાજ કે એક-બે મકાનમાંથી આવે છે, તેમના માટે છેલ્લી તારીખમાં કોઈ ફેરફાર કરાયો નથી. તેમણે 31 જુલાઈ 2026 સુધીમાં જ પોતાનું રિટર્ન ફાઇલ કરવાનું રહેશે.

નાના વેપારીઓ અને પ્રોફેશનલ્સ (ITR-3 અને ITR-4 - ઓડિટ વિનાના): ફ્રીલાન્સર્સ, કન્સલ્ટન્ટ્સ, ડોક્ટરો, વકીલો, નાના દુકાનદારો અને પ્રિઝમ્પ્ટિવ ટેક્સેશનનો વિકલ્પ પસંદ કરનારાઓને સરકારે મોટી રાહત આપી છે. હવે આ વર્ગના લોકો 31 ઓગસ્ટ 2026 સુધીમાં પોતાનું ITR ભરી શકશે. ખાતાવહી અને હિસાબના મિલાન માટે તેમને આખો એક મહિનો વધારે મળ્યો છે.

ટેક્સ ઓડિટ વાળા કેસ: જે બિઝનેસ અથવા કંપનીઓનું ટેક્સ ઓડિટ થવાનું છે, તેમના માટે રિટર્ન ભરવાની છેલ્લી તારીખ 31 ઓક્ટોબર 2026 નક્કી કરવામાં આવી છે. જોકે, તેમણે ઓડિટ રિપોર્ટ એક મહિનો પહેલાં એટલે કે 30 સપ્ટેમ્બર સુધીમાં જમા કરાવવો પડશે.