આવકવેરાના નિયમોમાં મોટો ફેરફાર! CBDTએ નવું ફોર્મ 173A કર્યું ફરજિયાત, પૂરો હિસાબ નહીં આપો તો ટેક્સમાં નહીં મળે છૂટ

CBDT Form 173A: જો તમે ઇન્કમ ટેક્સના નિયમો પર નજર રાખો છો, તો કેન્દ્ર સરકારનો આ નવો નિર્ણય તમારા માટે જાણવો ખૂબ જરૂરી છે. સરકારી જામીનગીરીઓ (Government Securities) માંથી થતી કમાણી અને વ્યાજ પર ટેક્સ છૂટ મેળવવા માટેના નિયમો વધુ કડક બનાવવામાં આવ્યા છે. સેન્ટ્રલ બોર્ડ ઓફ ડાયરેક્ટ ટેક્સીસ (CBDT) એ આવકવેરા નિયમો 2026 માં સુધારો કરીને નવું 'ફોર્મ 173A' દાખલ કર્યું છે. આ નિયમનો સીધો અર્થ એ છે કે, હવે રોકાણ અને કમાણીનો પાક્કો હિસાબ સરકારને આપશો તો જ ટેક્સમાં રાહત મળશે!

કોને મળશે આ ટેક્સ છૂટનો ફાયદો?

સૌથી પહેલા તો એ સ્પષ્ટ કરી દઈએ કે આ નવો નિયમ અને ટેક્સની છૂટ સામાન્ય નાગરિકો માટે નથી. આ ખાસ જોગવાઈ વિદેશી અને આંતરરાષ્ટ્રીય સંસ્થાઓ માટે છે. આવકવેરા કાયદા 2025 ના શિડ્યૂલ-4 ની એન્ટ્રી 13D હેઠળ 'વિદેશી સંસ્થાકીય રોકાણકારો' ને આ લાભ મળશે. જ્યારે, એન્ટ્રી 13E હેઠળ 'બેંક ફોર ઇન્ટરનેશનલ સેટલમેન્ટ્સ' (BIS) ને નિર્ધારિત શરતો મુજબ કરમુક્તિ મળશે. આ બંને સંસ્થાઓને સરકારી જામીનગીરીઓ પર મળતા વ્યાજ અને તેને વેચવાથી કે ટ્રાન્સફર કરવાથી થતા નફા પર ઇન્કમ ટેક્સમાંથી મુક્તિ આપવામાં આવી છે.

નવા ફોર્મ 173A માં કઈ વિગતો આપવી પડશે?

ટેક્સ છૂટનો દાવો સાચો છે કે નહીં તેની ચકાસણી કરવા માટે રોકાણકારોએ આ ફોર્મમાં પૂરી પારદર્શિતા રાખવી પડશે. આ ફોર્મને બે ભાગમાં વહેંચવામાં આવ્યું છે:

પહેલો વિભાગ (સામાન્ય માહિતી): આમાં રોકાણકારનું નામ, સરનામું, દેશ, PAN નંબર, ઈમેલ આઈડી, સંપર્ક નંબર અને ટેક્સ વર્ષની માહિતી આપવાની રહેશે. વિદેશી રોકાણકારો (FII) એ પોતાના દેશનો ટેક્સ નંબર (TIN) અને સેબી (SEBI)નો રજીસ્ટ્રેશન નંબર પણ આપવો પડશે. જોકે, BIS ને આ બે ખાસ વિગતો આપવામાંથી મુક્તિ અપાઈ છે.

બીજો વિભાગ (રોકાણનો હિસાબ): આ વિભાગમાં સરકારી જામીનગીરીનો ISIN નંબર, પ્રકાર, મુદત, 1 એપ્રિલના રોજ રોકાણની શરૂઆતની કિંમત, વર્ષ દરમિયાન કરેલી નવી ખરીદી, વેચાણની રકમ અને 31 માર્ચના રોજની ફાઈનલ વેલ્યુ બતાવવી પડશે. આ ઉપરાંત, આખા વર્ષ દરમિયાન મળેલું કુલ વ્યાજ અને થયેલા મૂડીલાભનો પણ સચોટ હિસાબ આપવો પડશે.