Credit card fuel surcharge: ક્રેડિટ કાર્ડથી પેટ્રોલ-ડીઝલ ખરીદવા પર 1% ચાર્જ, કોટક મહિન્દ્રા બેન્ક શરૂ કરશે નવી ફી

Credit card fuel surcharge: જો તમે ક્રેડિટ કાર્ડથી પેટ્રોલ, ડીઝલ કે CNG ભરાવો છો, તો હવે તમારે વધારાનો ખર્ચો ભોગવવો પડશે. પ્રાઇવેટ સેક્ટરની અગ્રણી બેન્ક, કોટક મહિન્દ્રા બેન્ક, 1 જૂન, 2025થી તેના કેટલાક ક્રેડિટ કાર્ડ યૂઝર્સ પાસેથી ફ્યૂઅલ ખરીદી પર 1% વધારાની ફી વસૂલવાની શરૂઆત કરશે. આ ફી ત્યારે લાગશે જ્યારે કાર્ડધારક બેન્ક દ્વારા નિર્ધારિત ચોક્કસ લિમિટથી વધુ ફ્યૂઅલ ખરીદી માટે ટ્રાન્ઝેક્શન કરશે. આ નવો નિયમ બેન્કના ચોક્કસ ક્રેડિટ કાર્ડ્સ પર જ લાગુ થશે, જેની વિગતો નીચે મુજબ છે.

ક્રેડિટ કાર્ડની લિમિટ અને ફીની વિગતો

કોટક મહિન્દ્રા બેન્કે તેના વિવિધ ક્રેડિટ કાર્ડ્સ માટે ફ્યૂઅલ ખરીદીની લિમિટ અલગ-અલગ નક્કી કરી છે. આજના સમયમાં મોટાભાગના લોકો પેટ્રોલ પંપ પર ક્રેડિટ કાર્ડનો ઉપયોગ કરે છે, કારણ કે તેનાથી કેશબેક અને રિવોર્ડ પોઇન્ટ્સનો લાભ મળે છે. જોકે, બેન્કનો આ નવો નિયમ ફ્યૂઅલ ખરીદી માટે ક્રેડિટ કાર્ડના અતિશય ઉપયોગને નિયંત્રિત કરવાના હેતુથી લાગુ કરવામાં આવ્યો છે.

50,000 રૂપિયાની લિમિટ: વ્હાઇટ સિગ્નેચર, પ્રિવી લીગ સિગ્નેચર અને કોટક ઇન્ડિગો 6E રિવોર્ડ્સ XL ક્રેડિટ કાર્ડ્સ માટે બિલિંગ સાયકલમાં ફ્યૂઅલ ખરીદીની લિમિટ 50,000 રૂપિયા નક્કી કરવામાં આવી છે. આ લિમિટ ક્રોસ કર્યા બાદ 1% ફી લાગશે.

35,000 રૂપિયાની લિમિટ: મોજો પ્લેટિનમ, જેન સિગ્નેચર, રોયલ કોટક સિગ્નેચર, PVR INOX, 6E રિવોર્ડ્સ ઇન્ડિગો કોટક ક્રેડિટ કાર્ડ, કોટક બિઝ અને NRI રોયલ સિગ્નેચર જેવા કાર્ડ્સ માટે ફ્યૂઅલ ખરીદીની લિમિટ 35,000 રૂપિયા નક્કી કરાઈ છે. આ લિમિટ પછી પણ 1% ફી લાગશે.

આ કાર્ડ્સ પર નહીં લાગે ફી

કોટક મહિન્દ્રા બેન્કે સ્પષ્ટ કર્યું છે કે વ્હાઇટ રિઝર્વ ક્રેડિટ કાર્ડ, કોટક સોલિટેર, કોટક ઇનફિનિટ, કોટક સિગ્નેચર, ઇન્ડિયન ઓઇલ કોટક ક્રેડિટ કાર્ડ અને મિન્ત્રા કોટક ક્રેડિટ કાર્ડ પર આ 1% ફી લાગુ નહીં થાય. આ કાર્ડધારકો ફ્યૂઅલ ખરીદી માટે કોઈ વધારાનો ચાર્જ ચૂકવવો પડશે નહીં.