DA Hike 2026: કેબિનેટ બેઠકમાં મોંઘવારી ભથ્થા પર કોઈ જાહેરાત નહીં, જાણો કર્મચારીઓએ હજુ કેટલી રાહ જોવી પડશે?

DA Hike 2026: દેશભરના લાખો કેન્દ્રીય સરકારી કર્મચારીઓ અને પેન્શનધારકો જુલાઈ 2026 ના છમાસિક રિવ્યૂ અંતર્ગત મોંઘવારી ભથ્થામાં વધારાની આતુરતાથી રાહ જોઈ રહ્યા છે. 21 ઓક્ટોબરના રોજ યોજાયેલી કેબિનેટ બેઠકમાં સૌને મોટી અપેક્ષા હતી. દશેરા અને બોનસના આ તહેવારોના સમયગાળામાં સરકાર મોંઘવારી ભથ્થા અંગે કોઈ મોટી જાહેરાત કરશે તેવું સૌ માની રહ્યા હતા, પરંતુ આ બેઠકમાં ડીએ વધારા અંગે કોઈ જ નિર્ણય ન લેવાતા કર્મચારીઓની આશા પર પાણી ફરી વળ્યું છે.

હવે ક્યારે થશે જાહેરાત?

21 ઓક્ટોબરની બેઠકમાં કોઈ જાહેરાત ન થતાં હવે સૌની નજર આગામી સપ્તાહે યોજાનારી કેબિનેટ બેઠક પર ટકેલી છે, જે 28 ઓક્ટોબર, બુધવારના રોજ મળી શકે છે. સામાન્ય રીતે કેન્દ્ર સરકારની કેબિનેટ બેઠકો બુધવારે જ થતી હોય છે, પરંતુ ક્યારેક સંજોગોવશાત તેના દિવસમાં ફેરફાર થઈ શકે છે અથવા એક જ સપ્તાહમાં એકથી વધુ વાર પણ બેઠક યોજાઈ શકે છે.

અગાઉ જાન્યુઆરી સાયકલ માટે ડીએમાં સુધારાની જાહેરાત પણ એક મહિના કરતા વધુ સમયના વિલંબ બાદ 18 એપ્રિલના રોજ શનિવારે યોજાયેલી કેબિનેટ બેઠકમાં કરવામાં આવી હતી. તે સમયે જુલાઈ 2025 સાયકલના 58% ભથ્થાને વધારીને જાન્યુઆરી સાયકલ માટે 60% કરવામાં આવ્યું હતું.

પેન્શન એક્સપર્ટ્સના જણાવ્યા અનુસાર, આ વિલંબ કોઈ માળખાગત સમસ્યા નથી પરંતુ માત્ર એક વહીવટી પ્રક્રિયાનો ભાગ છે. આ વિલંબ પાછળ 8મા પગાર પંચ (8th CPC)ના માળખામાં થઈ રહેલા ફેરફારો જવાબદાર છે. નવા માળખા હેઠળ કેન્દ્રીય કર્મચારીઓના સુધારેલા પગાર ધોરણને મોંઘવારીના આંકડાઓ સાથે વ્યવસ્થિત રીતે સેટ કરવું અત્યંત જરૂરી છે, જેમાં થોડો સમય લાગી રહ્યો છે.

કેટલો વધશે તમારો પગાર?

મોંઘવારી ભથ્થામાં સુધારો હંમેશા AICPI-IW (ઔદ્યોગિક શ્રમિકો માટે અખિલ ભારતીય ગ્રાહક ભાવ સૂચકાંક) ના 12 મહિનાના સરેરાશ આંકડા પર આધારિત હોય છે. જુલાઈ 2026 ના ડીએ સુધારા માટેના આ 12 મહિનાના આંકડા પહેલેથી જ પૂરા થઈ ગયા છે. પ્રાપ્ત આંકડાઓ મુજબ, આગામી છમાસિક ડીએમાં 3 થી 4% નો વધારો થવાની પ્રબળ શક્યતા છે. જો આમ થશે તો હાલનું 60% મોંઘવારી ભથ્થું વધીને સીધું 63 થી 64% સુધી પહોંચી જશે. જો ડીએમાં માત્ર 2 થી 3% નો પણ વધારો થાય, તો પણ કર્મચારીઓની માસિક આવકમાં સારો એવો ઉછાળો જોવા મળશે. એક સામાન્ય ગણતરી મુજબ, 18000 રૂપિયાનો બેઝિક પગાર ધરાવતા કર્મચારીઓને દર મહિને 360 થી 540 રૂપિયાનો ફાયદો થઈ શકે છે. જ્યારે 29200 રૂપિયાના બેઝિક પગાર પર આ વધારો 584 થી 876 રૂપિયાની આસપાસ હોઈ શકે છે.

આ પણ વાંચો- બર્લિનમાં પીયૂષ ગોયલે યુરોપિયન દેશોને બરાબરના સંભળાવ્યા: કાર્બન ટેક્સ પર આંકડા આપીને બોલતી બંધ કરી દીધી

કેન્દ્રીય કર્મચારીઓએ ડીએ વધારાના સત્તાવાર એલાન માટે હજુ થોડી વધુ રાહ જોવી પડશે. 8મા પગાર પંચના નિયમો અને ડેટા સેટિંગના કારણે વહીવટી પ્રક્રિયામાં સમય લાગી રહ્યો છે, પરંતુ આંકડાઓ જોતા પગારમાં એક સારો અને સંતોષકારક વધારો નિશ્ચિત માનવામાં આવી રહ્યો છે.