ભારતીયોને સોનાના ઘરેણાંનો ભારે શોખ હોય છે, પરંતુ હવે વધતા ભાવોને કારણે સોનું ખરીદવું સામાન્ય માણસ માટે મુશ્કેલ બની રહ્યું છે. દેશનું સંગઠિત ગોલ્ડ જ્વેલરી સેક્ટર હાલમાં માંગમાં મોટા ઘટાડાનો સામનો કરી રહ્યું છે.
ગોલ્ડ જ્વેલરી સેક્ટરને 10 વર્ષનો સૌથી મોટો ફટકો પડશે! FY27 માં વેચાણમાં 15% સુધીના ઘટાડાનો અંદાજ
ભારતના ગોલ્ડ જ્વેલરી સેક્ટરને નાણાકીય વર્ષ 2026-27 (FY27) માં 10 વર્ષની સૌથી મોટી મંદીનો સામનો કરવો પડી શકે છે. સોનાના ઊંચા ભાવ અને આયાત ડ્યૂટી વધવાને કારણે ઘરેણાંના વેચાણમાં 13-15% ઘટાડાની ભીતિ છે. જાણો સંપૂર્ણ રિપોર્ટ.
MoneyControl Newsઅપડેટેડ May 24, 2026 પર 1:02 PM
વેચાણમાં થશે 10 વર્ષનો સૌથી મોટો ઘટાડો
ક્રિસિલ (CRISIL) રેટિંગ્સના એક નવા રિપોર્ટ અનુસાર, ચાલુ નાણાકીય વર્ષ 2026-27 (FY27) માં જ્વેલરીના વેચાણમાં 13-15 ટકાનો મોટો ઘટાડો જોવા મળી શકે છે. એવી શક્યતા છે કે સોનાની કુલ માંગ ઘટીને માત્ર 620-640 ટન રહી જશે. કોરોના મહામારીથી પ્રભાવિત વર્ષ 2021 ને બાદ કરતા, આ છેલ્લા 10 વર્ષમાં સોનાની માંગનું સૌથી નીચું સ્તર હશે.
આયાત ડ્યૂટીમાં વધારો બન્યો મોટી અડચણ
આ ઘટાડા પાછળનું મુખ્ય કારણ સોના-ચાંદીના આસમાને પહોંચેલા ભાવ અને સરકારે વધારેલી આયાત ડ્યૂટી (Import Duty) છે. કેન્દ્ર સરકારે તાજેતરમાં સોના પરની આયાત ડ્યૂટી 6 ટકાથી વધારીને સીધી 15 ટકા કરી દીધી છે.
ક્રિસિલ રેટિંગ્સના ડિરેક્ટર હિમાંક શર્માના જણાવ્યા અનુસાર, સરકારનો આ નિર્ણય ઘરેણાંની માંગ ઘટાડવામાં મોટો ભાગ ભજવશે. સરકારનો આયાત ડ્યૂટી વધારવા પાછળનો મુખ્ય હેતુ આયાત ઘટાડીને વેપાર ખાધ અને રૂપિયા પરનું દબાણ ઓછું કરવાનો છે. ઉલ્લેખનીય છે કે, નાણાકીય વર્ષ 2026 માં ભારતે 720 ટન સોનાની આયાત કરી હતી, જેના કારણે 72 અબજ ડોલરનું વિદેશી હુંડિયામણ દેશની બહાર ગયું હતું.
ભાવમાં 55 ટકાનો ઉછાળો અને ગ્રાહકોનો બદલાતો ટ્રેન્ડ
ભૌગોલિક-રાજકીય અસ્થિરતા અને અમેરિકન ડોલર સામે રૂપિયાના નબળા પડવાના કારણે, ગત નાણાકીય વર્ષ 2025-26 માં સ્થાનિક બજારમાં સોનાના ભાવમાં 55 ટકાનો જંગી ઉછાળો આવ્યો હતો. આનાથી લોકોની ખરીદશક્તિ પર સીધી અસર પડી છે.
આટલા ઊંચા ભાવના કારણે ગ્રાહકો હવે 16-22 કેરેટના હળવા વજનના ઘરેણાં અને જડાઉ જ્વેલરી તરફ વધુ વળી રહ્યા છે.
રોકાણકારોનો ટ્રેન્ડ પણ બદલાયો છે. છેલ્લા બે વર્ષમાં ઘરેણાંના વેચાણમાં 25 ટકાનો ઘટાડો થયો છે, જ્યારે સોનાના સિક્કા અને બિસ્કિટ (બાર) ના વેચાણમાં 50 ટકાથી વધુનો વધારો નોંધાયો છે. લોકો સોનાને એક શ્રેષ્ઠ અને સુરક્ષિત રોકાણ માની રહ્યા છે.
વેચાણ ઘટવા છતાં રિટેલર્સની કમાણી 25 ટકા વધશે!
ભલે સોનાના ઘરેણાંનું વોલ્યુમ ઘટી રહ્યું હોય, પરંતુ સંગઠિત જ્વેલરી રિટેલર્સની આવકમાં આ નાણાકીય વર્ષમાં 20-25 ટકાનો વધારો થવાની આશા છે. આનું મુખ્ય કારણ સોનાના અત્યંત ઊંચા ભાવ છે. રિપોર્ટ મુજબ, બજારમાં વેચાણ વધારવા માટે વેપારીઓ ગ્રાહકોને આકર્ષક ડિસ્કાઉન્ટ પણ આપી શકે છે. આ ઉપરાંત, બ્રાન્ડેડ જ્વેલર્સ હવે ફ્રેન્ચાઈઝી મોડલ અપનાવીને નાના શહેરો (ટિયર-2 અને ટિયર-3) માં પણ પોતાનો વ્યાપ વધારી રહ્યા છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.