શું હવે UPI પેમેન્ટ પર લાગશે ચાર્જ? 2000થી વધુના ટ્રાન્ઝેક્શન અંગે સંસદમાં નવું બિલ, જાણો તમારા ખિસ્સા પર કેટલી અસર થશે

આજના સમયમાં શાકભાજી લેવાથી માંડીને શોપિંગ કરવા સુધી આપણે સૌ ડિજિટલ પેમેન્ટનો છૂટથી ઉપયોગ કરીએ છીએ. અત્યાર સુધી આ સુવિધા એકદમ ફ્રી હતી, પરંતુ હવે તેમાં મોટો ફેરફાર થવા જઈ રહ્યો છે. વેપારીઓને કરવામાં આવતા મોટા પેમેન્ટ પર ટૂંક સમયમાં ચાર્જ ચૂકવવો પડી શકે છે.

સંસદમાં રજૂ થયું નવું બિલ

કેન્દ્રીય નાણામંત્રી નિર્મલા સીતારમણે મંગળવારે સંસદમાં ટેક્સેશન એન્ડ અધર લોઝ એમેન્ડમેન્ટ બિલ રજૂ કર્યું છે. આ બિલમાં બેંકો અને પેમેન્ટ સર્વિસ પ્રોવાઇડર્સ દ્વારા અમુક નક્કી કરેલા ઇલેક્ટ્રોનિક પેમેન્ટ મોડ પર MDR (મર્ચન્ટ ડિસ્કાઉન્ટ રેટ) લગાવવા પરનો પ્રતિબંધ હટાવવાની જોગવાઈ કરવામાં આવી છે. જોકે, સરકારી અધિકારીઓના જણાવ્યા મુજબ આ નવો નિયમ ક્યારથી લાગુ થશે, તેનો નિર્ણય હજુ લેવાયો નથી.

કેટલો ચાર્જ લાગશે?

નવા પ્રસ્તાવ મુજબ, જો કોઈ ગ્રાહક કોઈપણ વેપારીને 2000 રૂપિયાથી વધુનું UPI પેમેન્ટ કરશે, તો તેના પર 0.25% થી લઈને 0.40% સુધીનો MDR ચાર્જ વસૂલવાની મંજૂરી મળી શકે છે.

સામાન્ય માણસને ડરવાની જરૂર નથી

આ સમાચાર સાંભળીને ગભરાવાની જરૂર નથી, કારણ કે સામાન્ય લોકોના રોજિંદા વ્યવહારો પર તેની કોઈ જ અસર નહીં થાય.એક વ્યક્તિના સામાન્ય UPI એકાઉન્ટમાંથી બીજી વ્યક્તિના સામાન્ય એકાઉન્ટમાં પૈસા મોકલવા પર કોઈ જ ચાર્જ લાગશે નહીં. દૂધ, શાકભાજી, કરિયાણું કે ઓટો-ટેક્સીના ભાડા જેવી નાની ખરીદી પર આ નિયમની કોઈ અસર નહીં થાય, કારણ કે તે વ્યવહારો મોટાભાગે 2000 રૂપિયાની અંદર જ હોય છે.