12 લાખથી વધુ અને 15 લાખ સુધીની વાર્ષિક આવક હોય તો જૂની ટેક્સ વ્યવસ્થા પસંદ કરો, નવીની સરખામણીએ થશે વધુ બચત

નાણામંત્રી નિર્મલા સીતારમણે બજેટમાં મધ્યમ વર્ગને મોટી રાહત આપતાં 12 લાખ રૂપિયા સુધીની વાર્ષિક આવકને આવકવેરામાંથી સંપૂર્ણ મુક્તિ આપવાની જાહેરાત કરી છે. નવા નાણાકીય વર્ષની શરૂઆત સાથે કરદાતાઓએ નવી અને જૂની ટેક્સ વ્યવસ્થા વચ્ચે પસંદગી કરવાની રહેશે. આવી સ્થિતિમાં, નવી ટેક્સ વ્યવસ્થામાં છૂટની મર્યાદા વધવા સાથે એ જાણવું જરૂરી છે કે કઈ વ્યવસ્થા તેમના માટે લાભદાયી છે.

12થી 15 લાખની આવક માટે જૂની વ્યવસ્થા ફાયદાકારક

ટેક્સ નિષ્ણાંતોના જણાવ્યા અનુસાર, 12 લાખ રૂપિયા (પગારદાર વ્યક્તિઓ માટે 12.75 લાખ રૂપિયા) સુધીની વાર્ષિક આવક ધરાવતા કરદાતાઓ માટે નવી ટેક્સ વ્યવસ્થા યોગ્ય છે. જોકે, 12 લાખથી વધુ અને 15 લાખ સુધીની આવક ધરાવતા લોકો માટે જૂની ટેક્સ વ્યવસ્થા વધુ બચત કરાવી શકે છે. આ લાભ ત્યારે જ મળશે જો કરદાતા લગભગ 5.5 લાખ રૂપિયાની ટેક્સ કપાતનો દાવો કરી શકે. જો આવક 15 લાખથી વધુ હોય, તો નવી વ્યવસ્થા વધુ ફાયદાકારક રહેશે.

કપાતનો દાવો કરનારાઓ માટે જૂની વ્યવસ્થા

જૂની ટેક્સ વ્યવસ્થા ત્યારે જ ફાયદાકારક છે જ્યારે કરદાતા 5.5 લાખ રૂપિયા સુધીની કપાતનો લાભ લઈ શકે. આ કપાતમાં આવકવેરા કાયદાની કલમ 80C હેઠળ 1.5 લાખ, કલમ 24(B) હેઠળ ગૃહ ઋણના વ્યાજ માટે 2 લાખ અને કલમ 80D (આરોગ્ય વીમો), 80G (દાન) તથા 80E (શિક્ષણ ઋણનું વ્યાજ) જેવી અન્ય કપાતો હેઠળ લગભગ 2 લાખ રૂપિયાનો સમાવેશ થાય છે.

નવી વ્યવસ્થામાં 12 લાખ સુધી મુક્તિ

2025-26ના બજેટમાં નાણામંત્રીએ 12 લાખ રૂપિયા (પગારદારો માટે 75,000 રૂપિયાની પ્રમાણભૂત કપાત સાથે 12.75 લાખ) સુધીની આવકને આવકવેરામાંથી મુક્તિ આપી છે. આ લાભ નવી કર વ્યવસ્થા પસંદ કરનારાઓને મળશે. જાલાને જણાવ્યું, “જો કરદાતા પાસે કોઈ બચત યોજના કે કપાત ન હોય, તો નવી વ્યવસ્થા વધુ લાભદાયી છે. પરંતુ જો કરદાતા 5.5 લાખથી ઓછી કપાત લે છે, તો પણ નવી વ્યવસ્થા મોટાભાગે ફાયદાકારક રહેશે.”