Train Ticket Booking: 1 ઓક્ટોબરથી ટ્રેન ટિકિટ બુકિંગનો નવો નિયમ, આધાર વેરિફિકેશન વિના નહીં મળે ટિકિટ!

Train Ticket Booking: ભારતીય રેલવે 1 ઓક્ટોબર 2025થી ઓનલાઈન ટ્રેન ટિકિટ બુકિંગના નિયમોમાં મહત્વનો ફેરફાર કરવા જઈ રહી છે. આ નવો નિયમ ખાસ કરીને IRCTC વેબસાઈટ અને એપ દ્વારા ટિકિટ બુક કરનારા મુસાફરોને અસર કરશે. જો તમે દિવાળી કે છઠ પૂજા માટે ઘરે જવાનું પ્લાનિંગ કરી રહ્યા છો, તો આ નવા નિયમ વિશે જાણવું ખૂબ જરૂરી છે.

શું છે નવો નિયમ?

નવા નિયમ અનુસાર, 1 ઓક્ટોબરથી રિઝર્વેશન ખુલ્યા બાદ પ્રથમ 15 મિનિટ સુધી ફક્ત આધાર વેરિફાઈડ એકાઉન્ટ ધરાવતા યુઝર્સ જ IRCTC વેબસાઈટ અને એપ દ્વારા જનરલ રિઝર્વેશન ટિકિટ બુક કરી શકશે. આ નિયમ અગાઉ તત્કાલ ટિકિટ બુકિંગ માટે જુલાઈ 2025થી લાગુ કરવામાં આવ્યો હતો, અને હવે તે જનરલ રિઝર્વેશન પર પણ લાગુ થશે. જોકે, રેલવેના PRS કાઉન્ટર પર ટિકિટ બુકિંગ માટે આ નિયમ લાગુ નહીં થાય, અને ત્યાંની પ્રક્રિયા પહેલાની જેમ જ ચાલુ રહેશે.

આ નિયમનો હેતુ શું છે?

રેલવેનો મુખ્ય ઉદ્દેશ ટિકિટ દલાલીને રોકવી અને ખરા મુસાફરો સુધી ટિકિટ પહોંચે તે સુનિશ્ચિત કરવાનો છે. આધાર વેરિફિકેશન દ્વારા રેલવે ટિકિટ બુકિંગમાં પારદર્શિતા લાવવા માંગે છે, જેથી થોકમાં ટિકિટ બુકિંગ અટકાવી શકાય. આ નિયમથી ખાસ કરીને તહેવારોની સિઝનમાં ટિકિટની ઉપલબ્ધતા વધુ ન્યાયી રીતે થશે.

રેલવે બોર્ડનો આદેશ

રેલવે બોર્ડે આ અંગે તાજેતરમાં એક આદેશ જારી કર્યો હતો, જેમાં જણાવાયું છે કે રિઝર્વેશન સિસ્ટમનો લાભ સામાન્ય મુસાફરો સુધી પહોંચે અને દલાલો દ્વારા તેનો દુરુપયોગ ન થાય તે માટે આ નિયમ લાગુ કરવામાં આવી રહ્યો છે. આદેશમાં એ પણ સ્પષ્ટ કરવામાં આવ્યું છે કે પ્રથમ 15 મિનિટ સુધી ફક્ત આધાર વેરિફાઈડ યુઝર્સ જ ઓનલાઈન ટિકિટ બુક કરી શકશે.