Income Tax Refund: 31 લાખ લોકોને ITR ભર્યા પછી પણ નહીં મળે ઈન્કમ ટેક્સ રિફંડ, કારણ જાણીને ચોંકી ઉઠશો

Income Tax Refund: ઘણા ટેક્સપેયર્સે સમયમર્યાદા પહેલાં ઇ-ફાઇલિંગ પોર્ટલ દ્વારા એસેસમેન્ટ વર્ષ 2023-24 અથવા નાણાકીય વર્ષ 2022-23 માટે આવકવેરા રિટર્ન ફાઇલ કર્યા હતા, પરંતુ તેમના ITR ની ચકાસણી કરી ન હતી. હવે આ ટેક્સપેયર્સને રિફંડ માટે લાયક ગણવામાં આવશે નહીં, કારણ કે IT વિભાગના નિયમો અનુસાર, તમામ ટેક્સપેયર્સે તેમના ITRની ચકાસણી કરવી ફરજિયાત છે.

જો ટેક્સપેયર તેના આવકવેરા રિટર્નની ચકાસણી નહીં કરે, તો ITR ભરેલ માનવામાં આવશે નહીં. આવકવેરા વિભાગ ITR ફાઇલ કર્યા પછી વેરિફિકેશન માટે 30 દિવસનો સમય આપે છે. જો વેરિફિકેશન ન થયું હોય તો આવકવેરા વિભાગ રિફંડ માટે પ્રક્રિયા કરશે નહીં. આવી સ્થિતિમાં આ ટેક્સપેયર્સે ફરીથી આવકવેરા રિટર્ન ભરવાનું રહેશે.

31 લાખ લોકોને રિફંડ નહીં મળે!

ઈન્કમટેક્સ વેબસાઈટ અનુસાર, 23 ઓગસ્ટ સુધી 6.91 કરોડથી વધુ લોકોએ રિટર્ન ફાઈલ કર્યું હતું, પરંતુ માત્ર 6.59 કરોડ ટેક્સપેયર્સે તેમના આઈટીઆરની ચકાસણી કરી છે. બાકીના 31 લાખ લોકોએ તેમના રિટર્નની ચકાસણી કરાવી નથી. આમાંથી, કેટલાક ટેક્સપેયર્સ માટે, વેરિફિકેશન માટે 30 દિવસનો સમય છે, જે ટૂંક સમયમાં સમાપ્ત થશે. આવકવેરા વિભાગે આ લોકોને વહેલી તકે વેરિફિકેશન કરાવવા માટે એલર્ટ કર્યું છે.