LPG Price Hike 2026: નવા વર્ષના પહેલા જ દિવસે કોમર્શિયલ ગેસ સિલિન્ડરના ભાવમાં 111નો ભડકો

LPG Price Hike 2026: નવા વર્ષ 2026ની સવાર દેશના વેપારીઓ અને હોટલ વ્યવસાય સાથે સંકળાયેલા લોકો માટે મોંઘવારીનો નવો ઝટકો લઈને આવી છે. ઓઈલ માર્કેટિંગ કંપનીઓએ વર્ષના પ્રથમ દિવસે એટલે કે 1 જાન્યુઆરી, 2026ના રોજ એલપીજી ગેસ સિલિન્ડરના ભાવમાં મોટો ફેરફાર કર્યો છે. આ ફેરફાર હેઠળ દેશભરમાં 19 કિલોના કોમર્શિયલ એલપીજી સિલિન્ડરના ભાવમાં પ્રતિ સિલિન્ડર 111 સુધીનો તોતિંગ વધારો કરવામાં આવ્યો છે. તહેવારો અને નવા વર્ષની ઉજવણી વચ્ચે આ ભાવવધારો કોમર્શિયલ વપરાશકર્તાઓનું બજેટ ખોરવી શકે છે. જોકે, આ મોંઘવારીના માહોલ વચ્ચે સામાન્ય જનતા માટે રાહતના સમાચાર એ છે કે 14 કિલોના ઘરેલુ ગેસ સિલિન્ડરના ભાવમાં કોઈ જ ફેરફાર કરવામાં આવ્યો નથી, જેના કારણે રસોડાના બજેટ પર કોઈ સીધી અસર પડશે નહીં.

કયા શહેરોમાં કેટલો ભાવ?

આ ભાવવધારાની સીધી અસર દેશના મુખ્ય મહાનગરોમાં જોવા મળી છે, જ્યાં નવા ભાવ 1 જાન્યુઆરી, 2026થી તાત્કાલિક અસરથી લાગુ થઈ ગયા છે. દિલ્હીની વાત કરીએ તો, અહીં 19 કિલોના કોમર્શિયલ સિલિન્ડર માટે હવે ગ્રાહકોએ વધુ કિંમત ચૂકવવી પડશે. દિલ્હીમાં જે સિલિન્ડર પહેલા 1580.50માં મળતો હતો, તેનો ભાવ હવે વધીને 1691.50 થઈ ગયો છે. તેવી જ રીતે દેશની આર્થિક રાજધાની મુંબઈમાં પણ ભાવમાં ઉછાળો આવ્યો છે. મુંબઈમાં કોમર્શિયલ સિલિન્ડરનો જૂનો ભાવ 1531.50 હતો, જે વધીને હવે 1642.50 પર પહોંચી ગયો છે. આ આંકડાઓ સ્પષ્ટ કરે છે કે વેપારીઓ પર બોજ વધવાનો છે.

કોલકાતા અને ચેન્નઈ જેવા અન્ય મેટ્રો શહેરોમાં પણ ભાવવધારાની અસર વર્તાઈ છે. કોલકાતામાં કોમર્શિયલ ગેસ સિલિન્ડરના ભાવમાં મોટો ઉછાળો નોંધાયો છે, જ્યાં જૂનો ભાવ 1684 હતો તે વધીને હવે 1795 થઈ ગયો છે. દક્ષિણ ભારતના મુખ્ય શહેર ચેન્નઈમાં પણ સ્થિતિ અલગ નથી. ચેન્નઈમાં 19 કિલોના સિલિન્ડરનો ભાવ 1739.50 થી વધીને 1849.50 કરવામાં આવ્યો છે. આમ, ચારેય મહાનગરોમાં ભાવવધારો 100 થી વધુનો રહ્યો છે, જે રેસ્ટોરન્ટ અને હોટલના જમવાના ભાવ પર ભવિષ્યમાં અસર કરી શકે છે.

ભાવવધારો સતત બે મહિનાના ઘટાડા બાદ આવ્યો

મહત્વની વાત એ છે કે આ ભાવવધારો સતત બે મહિનાના ઘટાડા બાદ આવ્યો છે, જેણે વેપારીઓને આંચકો આપ્યો છે. આ પહેલા ડિસેમ્બર 2025 અને નવેમ્બર 2025માં કોમર્શિયલ ગેસના ભાવમાં ઘટાડો જોવા મળ્યો હતો. ઉલ્લેખનીય છે કે 1 ડિસેમ્બર, 2025ના રોજ દિલ્હી અને કોલકાતામાં 10 અને મુંબઈ-ચેન્નઈમાં 11નો ઘટાડો થયો હતો. પરંતુ નવા વર્ષની શરૂઆતમાં જ ઓઈલ કંપનીઓએ આ ઘટાડાની કસર કાઢીને સીધો 111નો વધારો ઝીંકી દીધો છે. આ અસ્થિરતા કોમર્શિયલ સેક્ટર માટે મુશ્કેલીરૂપ સાબિત થઈ શકે છે.

ઘરેલુ ગેસના ભાવ સ્થિર