નોકરી છોડવાનો વિચાર કરી રહ્યા છો? PFના આ 5 મોટા ફાયદા જાણી લો, મુશ્કેલ સમયમાં બનશે તમારો સૌથી મોટો સહારો

provident fund benefits: આજના સમયમાં પ્રાઇવેટ નોકરીમાં ક્યારે શું થઈ જાય તે કોઈ કહી શકતું નથી. કંપની બંધ થવી કે છટણીના ડર વચ્ચે, તમારી સેલરીમાંથી કપાતા 'PFના પૈસા' તમારું સૌથી મોટું સુરક્ષા કવચ છે.

મોટાભાગના લોકો એવું જ માનતા હોય છે કે પીએફના પૈસા માત્ર રિટાયરમેન્ટ વખતે જ કામ આવે છે. પરંતુ એવું બિલકુલ નથી. EPFO ના નિયમો અનુસાર, આ તમારી મહેનતની કમાણીને માત્ર વધારે જ નથી, પરંતુ ખરાબ સમયમાં તમારા અને તમારા પરિવાર માટે એક મજબૂત ઢાલ પણ બને છે. ચાલો, એકદમ સરળ ભાષામાં સમજીએ PF ના એ 5 મોટા ફાયદાઓ, જે દરેક નોકરીયાત વ્યક્તિને ખબર હોવા જ જોઈએ:

1. ડબલ બચત: તમારી સાથે કંપનીનો પણ હિસ્સો

પીએફમાં માત્ર તમારા ખિસ્સામાંથી જ પૈસા નથી કપાતા. તમારી બેઝિક સેલરીના 12% રકમ PF માં જમા થાય છે, તો સામે તમારી કંપની પણ એટલા જ એટલે કે 12% પૈસા તમારા ખાતામાં જમા કરે છે. આનો સીધો મતલબ એ છે કે, કંઈપણ અલગ કર્યા વગર તમારી બચત દર મહિને બમણી થઈ જાય છે. લાંબા ગાળે આ રકમ વ્યાજ સાથે મળીને એક મોટું ફંડ બની જાય છે.

EPF ખાતામાં જમા થયેલા પૈસા પર જે વ્યાજ મળે છે તે સંપૂર્ણપણે ટેક્સ-ફ્રી હોય છે. એટલે કે તમારી આ કમાણી પર સરકાર કોઈ ટેક્સ લેતી નથી. આ ઉપરાંત, તમે ઇન્કમ ટેક્સની કલમ 80C હેઠળ દર વર્ષે રૂપિયા 1.5 લાખ સુધીના રોકાણ પર ટેક્સમાં છૂટ મેળવી શકો છો. આ ફાયદો તમારી બચતને વધુ નફાકારક બનાવે છે.

3. મુશ્કેલ સમયમાં એડવાન્સ ઉપાડ

EPF ની રકમ માત્ર વૃદ્ધાવસ્થા માટે નથી. જો તમને કોઈ મોટી જરૂરિયાત ઉભી થાય, તો તમે એડવાન્સ પૈસા પણ ઉપાડી શકો છો. ઘર બનાવવું હોય, બીમારીનો ઈલાજ કરવો હોય, બાળકોનું શિક્ષણ કે લગ્ન જેવા પ્રસંગો માટે પીએફ ખાતામાંથી અમુક રકમ ઉપાડવાની સુવિધા મળે છે. બેરોજગારી કે અન્ય કોઈ ઈમરજન્સીમાં પણ આ પૈસા તમારો આર્થિક સહારો બને છે.

4. પરિવાર માટે મફત ઇન્શ્યોરન્સ અને આર્થિક સુરક્ષા

આ પૈસા માત્ર તમારા માટે જ નથી, પરંતુ તમારા પરિવારનો પણ આધાર છે. તમને જાણીને નવાઈ લાગશે કે પીએફ ખાતાની સાથે તમને રૂપિયા 7 લાખ સુધીનો ફ્રી લાઈફ ઇન્શ્યોરન્સ (EDLI સ્કીમ હેઠળ) મળે છે. સૌથી મોટી વાત એ છે કે, કોઈ પણ કોર્ટ કે લેણદાર તમારા પીએફના પૈસા જપ્ત કરી શકતા નથી. જો ખાતાધારકનું મૃત્યુ થાય, તો પરિવારને EPS હેઠળ પેન્શનનો લાભ પણ મળે છે.

5. પર્સનલ ઇમરજન્સી ફંડ અને નોકરી જવાનો ડર

જો કોઈ કારણસર તમારી નોકરી છૂટી જાય, તો 2 મહિના પછી તમે તમારા પીએફના પૂરા પૈસા ઉપાડી શકો છો. તમે નોકરી બદલો ત્યારે પણ તમારું ફંડ સંપૂર્ણપણે સુરક્ષિત રહે છે, જેને તમે નવી કંપનીમાં ટ્રાન્સફર કરી શકો છો.

નોકરી બદલતી વખતે UAN છે ખૂબ મહત્વનું

જ્યારે તમે નોકરી બદલો છો, ત્યારે તમારો Universal Account Number ખૂબ કામ આવે છે. UAN ની મદદથી તમે નવી નોકરીમાં નવું એકાઉન્ટ ખોલાવવાને બદલે તમારા જૂના PF ખાતાને જ આગળ વધારી શકો છો. આનાથી તમારા બધા પૈસા એક જ જગ્યાએ ભેગા થાય છે અને તેને મેનેજ કરવું ખૂબ સરળ બની જાય છે.

કરિયર બદલતી વખતે કે નોકરી જતી રહે ત્યારે EPF માત્ર એક બચત નથી રહેતું, પણ તે આર્થિક સંકટ સમયે તમારી લાઈફલાઈન બની જાય છે. તેથી, દર મહિને પગારમાંથી કપાતી આ રકમને બોજ ન સમજતા, તેના પેન્શન, વીમા અને ટેક્સ સેવિંગ જેવા અદ્ભુત ફાયદાઓને સમજો અને સ્માર્ટ રીતે તેનું પ્લાનિંગ કરો.

આ પણ વાંચો-US H-1B Visa Update: અમેરિકામાં નોકરી કરતા ભારતીયોનું ટેન્શન વધશે, નોકરી જતાં જ તરત દેશ છોડવો પડશે, 60 દિવસનો ગ્રેસ પિરિયડ ખતમ થવાની તૈયારી