Tomato Prices Hike: મોંઘવારીથી ટામેટા ફરી થયા લાલ, તમિલનાડુમાં 200 રૂપિયા પ્રતિ કિલોને પાર

Tomato Prices Hike: ટામેટાના ભાવમાં દિવસેને દિવસે વધારો થઈ રહ્યો છે. તેની કિંમતમાં ઘટાડો થવાની શક્યતાઓ ઘણી ઓછી છે. તમિલનાડુમાં ટામેટાંની જથ્થાબંધ કિંમત 200 રૂપિયા પ્રતિ કિલોએ પહોંચી ગઈ છે. રાજ્યના પાટનગરના અનેક વિસ્તારોમાં ટામેટાના ભાવ આસમાને છે. ચેન્નાઈના કોયમ્બેડુ હોલસેલ માર્કેટમાં ટામેટાંની અછતને કારણે ભાવમાં ઝડપથી વધારો થયો છે. ટામેટાંની વધતી કિંમતોને કારણે તમિલનાડુમાં લોકોને ઘણી મુશ્કેલીઓનો સામનો કરવો પડી રહ્યો છે.

કોયમ્બેડુ માર્કેટમાં જથ્થાબંધ શાકભાજી વેચનાર પી.વી. અહેમદે જણાવ્યું હતું કે, કર્ણાટક અને આંધ્રપ્રદેશમાં વચ્ચે-વચ્ચે વરસાદ પડી રહ્યો છે. જેના કારણે ટામેટાના પાકને ઘણું નુકસાન થયું છે. આવી સ્થિતિમાં બંને રાજ્યોમાંથી ટામેટાંનું આગમન થયું છે. જેના કારણે બજારમાં ટામેટાંના ભાવમાં વધારો થયો છે.

આવતા અઠવાડિયે ટામેટાના ભાવ 250 રૂપિયા પ્રતિ કિલો સુધી પહોંચી શકે છે

તે જ સમયે, વેપારીઓનું કહેવું છે કે તેની કિંમતમાં વધારો ચાલુ રહી શકે છે. આગામી સપ્તાહે તેની કિંમત 250 રૂપિયા પ્રતિ કિલો સુધી પહોંચી શકે છે. કોયમ્બેડુ હોલસેલ મર્ચન્ટ્સ એસોસિએશનના સેક્રેટરી પી. સુકુમારને જણાવ્યું હતું કે આ વખતે બજારના ઈતિહાસમાં પ્રથમ વખત ટમેટાની કિંમત 200 રૂપિયા પ્રતિ કિલોએ પહોંચી છે. અમને આશા હતી કે 20 જુલાઈ સુધીમાં તેની કિંમતો સ્થિર થઈ જશે. પરંતુ અચાનક વરસાદના કારણે પાક બરબાદ થયો હતો. આંધ્રપ્રદેશ અને કર્ણાટકમાં વરસાદને કારણે ટામેટાની 50 ટકાથી વધુ ખેતી બરબાદ થઈ ગઈ છે.