એપલનો ભારતમાં દબદબો: ટ્રમ્પ અને ચીનને અવગણી બેંગલોરમાં નવું iPhone-17 પ્લાન્ટ શરૂ

અમેરિકાના રાષ્ટ્રપતિ ડોનાલ્ડ ટ્રમ્પે ટેક જાયન્ટ એપલને ભારતમાં આઈફોનનું ઉત્પાદન બંધ કરવા જણાવ્યું હતું, પરંતુ એપલે આ દબાણને નજરઅંદાજ કરી ભારતમાં પોતાનું પ્રોડક્શન વધાર્યું છે. તાઇવાનની અગ્રણી ઇલેક્ટ્રોનિક કંપની ફોક્સકોન દ્વારા બેંગલોર નજીક દેવનહલ્લીમાં નવા પ્લાન્ટમાં iPhone-17નું ઉત્પાદન શરૂ થયું છે. આ પ્લાન્ટ ફોક્સકોનનું ચીનની બહારનું બીજું સૌથી મોટું મેન્યુફેક્ચરિંગ યુનિટ છે, જેમાં 2.8 billion ડોલર (આશરે 25,000 કરોડ રૂપિયા)નું રોકાણ કરવામાં આવ્યું છે. સૂત્રોના જણાવ્યા અનુસાર, આ પ્લાન્ટમાં હાલ નાના પાયે iPhone-17નું ઉત્પાદન ચાલી રહ્યું છે. ફોક્સકોન પહેલાથી જ ચેન્નાઇમાં આઈફોન-17 બનાવે છે, અને બેંગલોરનો નવો પ્લાન્ટ તેની ક્ષમતા વધારશે.

ચીનનો વિરોધ અને એપલની રણનીતિ

ચીન ભારતમાં આઈફોનના વધતા ઉત્પાદનથી નારાજ છે અને તેણે પોતાના સેંકડો ઇજનેરોને ભારતમાંથી પાછા બોલાવી લીધા હતા. આમ છતાં, ફોક્સકોને તાઇવાન અને અન્ય સ્થળોએથી નિષ્ણાતોને બોલાવી આ અડચણ દૂર કરી છે. એપલની યોજના ચાલુ વર્ષે આઈફોનનું ઉત્પાદન 60 million યુનિટ સુધી વધારવાની છે, જે 2024-25માં 35-40 million યુનિટ હતું. એપલે 31 માર્ચ, 2025ના રોજ પૂરા થતા નાણાકીય વર્ષમાં ભારતમાં 22 billion ડોલર મૂલ્યના આઈફોનનું એસેમ્બલિંગ કર્યું હતું, જે અગાઉના વર્ષની સરખામણીએ 60% વધારે છે.

અમેરિકામાં ભારતીય આઈફોનની માંગ

એપલના CEO ટિમ કૂકે 31 જુલાઇ, 2025ના રોજ નાણાકીય પરિણામોની જાહેરાતમાં જણાવ્યું હતું કે જૂન, 2025ની ત્રિમાસિકમાં અમેરિકામાં વેચાયેલા મોટાભાગના આઈફોન ભારતથી આયાત કરવામાં આવ્યા છે. આ ઉપરાંત, ભારતમાં એપલની સપ્લાય વાર્ષિક ધોરણે 19.7% વધી છે, જેનાથી ભારતના સ્માર્ટફોન માર્કેટમાં એપલનો હિસ્સો 7.5% થયો છે. IDCના રિપોર્ટ મુજબ, જૂન ત્રિમાસિકમાં ચીનની કંપની વીવો 19% હિસ્સા સાથે ભારતીય સ્માર્ટફોન માર્કેટમાં ટોચ પર છે.

આ પણ વાંચો-Shipping stocks: શિપિંગ સેક્ટરને મળશે મોટી ભેટ ટૂંક સમયમાં, શિપને મળી શકે છે ઈન્ફ્રાસ્ટ્રક્ચરનો દરજ્જો