UPI યુઝર્સ માટે મોટા સમાચાર: MDR લાગુ થાય તે પહેલાં જ વ્યવહારોમાં 1.8%નો મોટો ઘટાડો, જાણો RBIનો લેટેસ્ટ રિપોર્ટ

UPI transactions latest data: આજના સમયમાં શાકભાજી લેવાથી માંડીને મોટા શોપિંગ મોલ સુધી દરેક જગ્યાએ આપણે UPIનો ઉપયોગ કરીએ છીએ. પરંતુ, રિઝર્વ બેંક ઓફ ઇન્ડિયા (RBI) ના એક લેટેસ્ટ રિપોર્ટ મુજબ, દેશમાં UPI ટ્રાન્ઝેક્શનમાં થોડો ઘટાડો જોવા મળ્યો છે. ખાસ વાત એ છે કે, વેપારીઓ માટે વધુ રકમના યુપીઆઈ પેમેન્ટ પર મર્ચન્ટ ડિસ્કાઉન્ટ રેટ લાગુ થવાના આશરે બે અઠવાડિયા પહેલા જ આ ઘટાડો નોંધાયો છે. ચાલો જાણીએ આંકડા શું કહે છે અને આ ઘટાડા પાછળનું સાચું કારણ શું છે.

સપ્ટેમ્બર મહિનામાં UPI ટ્રાન્ઝેક્શનમાં ઘટાડો

RBI દ્વારા જાહેર કરવામાં આવેલા નવા આંકડા મુજબ, સપ્ટેમ્બર મહિનામાં માસિક આધાર પર UPI ટ્રાન્ઝેક્શનમાં 1.8 ટકાનો ઘટાડો નોંધાયો છે. આ મહિનામાં કુલ 2407 કરોડ ટ્રાન્ઝેક્શન થયા છે. જ્યારે અગાઉ ઓગસ્ટ મહિનામાં નેશનલ પેમેન્ટ્સ કોર્પોરેશન ઓફ ઇન્ડિયા (NPCI) દ્વારા સંચાલિત UPI મારફતે 2450 કરોડ વ્યવહારો થયા હતા. માત્ર ટ્રાન્ઝેક્શનની સંખ્યા જ નહીં, પરંતુ પેમેન્ટની કુલ વેલ્યુ (રકમ) માં પણ 1.50 ટકાનો ફટકો પડ્યો છે. ઓગસ્ટ મહિનામાં UPI પેમેન્ટની કુલ વેલ્યુ 29.82 લાખ કરોડ રૂપિયા હતી, જે સપ્ટેમ્બરમાં ઘટીને 29.37 લાખ કરોડ રૂપિયા થઈ ગઈ છે.

શું છે આ ઘટાડા પાછળનું સાચું કારણ?

જો તમને લાગતું હોય કે લોકોએ UPI નો ઉપયોગ ઓછો કરી દીધો છે, તો એવું બિલકુલ નથી. ન્યૂઝ એજન્સીના રિપોર્ટ અને ઇન્ડસ્ટ્રીના નિષ્ણાતોના મતે, આ ઘટાડા પાછળનું મુખ્ય કારણ મહિનાના દિવસો છે. ઓગસ્ટ મહિનામાં 31 દિવસ હતા, જ્યારે સપ્ટેમ્બરમાં 30 દિવસ હોય છે. એક દિવસ ઓછો હોવાના કારણે કુલ આંકડામાં આ ઘટાડો દેખાઈ રહ્યો છે.

આ વાતની સાબિતી એ છે કે, રોજના સરેરાશ વ્યવહારોમાં તો ખરેખર વધારો જ થયો છે! ઓગસ્ટમાં રોજ સરેરાશ 79.1 કરોડ ટ્રાન્ઝેક્શન થતા હતા, જે સપ્ટેમ્બરમાં વધીને પ્રતિદિન 80.2 કરોડ થઈ ગયા છે.

અન્ય ડિજિટલ પેમેન્ટ માધ્યમોની શું છે સ્થિતિ?