US Court dismisses Adani case: અદાણી ગ્રુપ અને તેના ચેરમેન ગૌતમ અદાણી માટે અમેરિકાથી અત્યંત રાહત આપનારા સમાચાર સામે આવ્યા છે. અમેરિકન કોર્ટે ગૌતમ અદાણી અને સાગર અદાણી સામે ચાલી રહેલા લાંચ અને છેતરપિંડીના તમામ ગુનાહિત આરોપોને સત્તાવાર રીતે ફગાવી દીધા છે. આ નિર્ણયથી વૈશ્વિક સ્તરે અદાણી ગ્રુપની છબી વધુ મજબૂત બની છે અને તેમના પર લટકતી તલવાર દૂર થઈ છે.
ગૌતમ અદાણી માટે અમેરિકાથી આવ્યા મોટા સમાચાર: લાંચ અને છેતરપિંડીના તમામ કેસ રદ, જાણો કોર્ટે શું કહ્યું?
US Court dismisses Adani case: ગૌતમ અદાણી માટે અમેરિકાથી મોટી રાહત. ન્યૂયોર્ક કોર્ટે ગૌતમ અને સાગર અદાણી સામેના લાંચ અને છેતરપિંડીના તમામ કેસ રદ કર્યા. જાણો આ ઐતિહાસિક નિર્ણયની સંપૂર્ણ વિગત.
MoneyControl Newsઅપડેટેડ Aug 11, 2026 પર 10:11 AM
કોર્ટે કેસ કાયમ માટે બંધ કર્યો
ન્યૂયોર્કના ઈસ્ટર્ન ડિસ્ટ્રિક્ટના યુએસ ડિસ્ટ્રિક્ટ જજ નિકોલસ ગારૌફિસે આ કેસમાં મહત્વનો ચુકાદો આપ્યો છે. તેમણે ફેડરલ પ્રોસિક્યુટર્સ ને અદાણી સામેના આરોપો પાછા ખેંચવાની મંજૂરી આપીને આ કેસને કાયમી ધોરણે બંધ કરી દીધો છે. જજે જાહેર હિત અને કાયદાકીય બાબતોને ધ્યાનમાં રાખીને વકીલો પાસે કેસ પાછો ખેંચવાનું કારણ માંગ્યું હતું, જેના જવાબથી સંતુષ્ટ થઈને આ નિર્ણય લેવાયો છે.
ગૌતમ અદાણીની પ્રતિક્રિયા: ‘સત્યની જીત થઈ'
આ ઐતિહાસિક નિર્ણય બાદ ગૌતમ અદાણીએ સોશિયલ મીડિયા પ્લેટફોર્મ 'X' પર પોતાની ખુશી વ્યક્ત કરી હતી. તેમણે અમેરિકન ન્યાયપ્રણાલી પ્રત્યે આદર વ્યક્ત કરતા લખ્યું કે, આવા મુશ્કેલ અને પડકારજનક સમયમાં પણ સત્ય, નિષ્પક્ષતા અને કાયદાના શાસન પર તેમનો વિશ્વાસ હંમેશાં અડીખમ રહ્યો છે.
અમેરિકન સરકારે સ્વીકારી પોતાની ભૂલ
યુએસ ડિપાર્ટમેન્ટ ઓફ જસ્ટિસ (DoJ) એ કોર્ટમાં સ્પષ્ટપણે સ્વીકાર્યું કે અદાણી ગ્રુપ સામેનો આ કેસ કાયદાકીય રીતે ખૂબ જ નબળો હતો. DoJ એ જે મુખ્ય વાતો કોર્ટમાં જણાવી તે નીચે મુજબ છે:
ભારતનો આંતરિક મામલો: આ કેસ સંપૂર્ણપણે ભારત સાથે સંકળાયેલો હતો. જેમાં ભારતીય અધિકારીઓ, ભારતીય કંપનીઓ અને ભારતમાં વીજળી પૂરા પાડવાના કોન્ટ્રાક્ટની જ વાત હતી. તેથી અમેરિકન કોર્ટનું આમાં કોઈ અધિકારક્ષેત્ર બનતું ન હતું.
અમેરિકા વિશ્વની પોલીસ નથી: સરકારી વકીલોએ માન્યું કે અમેરિકાએ 'વિશ્વની પોલીસ' બનીને અન્ય દેશોના આંતરિક મામલામાં માથું મારવું ન જોઈએ. ભારત પોતાની કાયદાકીય વ્યવસ્થા સંભાળવા માટે સંપૂર્ણ સક્ષમ છે.
સમયનો બગાડ: આવા બિનજરૂરી કેસથી બે દેશોના રાજદ્વારી સંબંધો બગડે છે અને કિંમતી સમય તથા સંસાધનોનો ખોટો વેડફાટ થાય છે.
રોકાણની અફવાઓનું ખંડન
કોર્ટની કાર્યવાહી દરમિયાન મીડિયામાં ચાલતી એ અફવાઓને પણ ફગાવી દેવામાં આવી હતી, જેમાં એવો દાવો થતો હતો કે અદાણી ગ્રુપ દ્વારા અમેરિકામાં મોટા રોકાણની ઓફરના કારણે આ કેસ રદ કરાયો છે. પ્રિન્સિપલ એસોસિએટ ડેપ્યુટી એટર્ની જનરલ આર ટ્રેન્ટ મેકકોટેરે કોર્ટમાં સ્પષ્ટતા કરી કે, આ નિર્ણયમાં કોઈ પણ સંભવિત રોકાણની કોઈ જ ભૂમિકા નથી. માત્ર ને માત્ર કેસમાં રહેલી કાયદાકીય ખામીઓના કારણે જ આ આરોપો પાછા ખેંચવામાં આવ્યા છે.
અંતે, આ નિર્ણયથી એ સાબિત થયું છે કે અદાણી ગ્રુપ સામે લગાવવામાં આવેલા સિક્યોરિટીઝ ફ્રોડના આરોપો પાયાવિહોણા હતા. ગૌતમ અદાણી માટે આ સત્યની મોટી જીત છે, જે અદાણી ગ્રુપના રોકાણકારો માટે પણ એક સકારાત્મક સમાચાર છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.