IDBI બેંકમાં કોઈની નોકરી નહીં જાય, નવા માલિક પ્રેમ વત્સાએ કર્મચારીઓને આપી મોટી ગેરંટી, જાણો શું છે માસ્ટરપ્લાન

IDBI Bank employees: વિદેશી સંસ્થાકીય રોકાણકારો (FIIs) ભલે ભારતીય શેરબજારમાંથી સતત પૈસા કાઢી રહ્યા હોય, પરંતુ કેનેડાના ભારતીય મૂળના અબજોપતિ પ્રેમ વત્સાએ ભારત પર મોટો દાવ રમ્યો છે. તેમના ફેયરફેક્સ ગ્રુપે (Fairfax Group) IDBI બેંકમાં 60.7% હિસ્સો ખરીદવાની બોલી જીતી લીધી છે. ભારતની નાણાકીય સિસ્ટમમાં આ અત્યાર સુધીનું સૌથી મોટું સીધું વિદેશી રોકાણ (FDI) માનવામાં આવે છે.

બેંકના ટેકઓવર પછી કર્મચારીઓમાં પોતાની નોકરીને લઈને જે ચિંતા હતી, તેને પ્રેમ વત્સાએ હંમેશા માટે દૂર કરી દીધી છે.

કર્મચારીઓની નોકરી સંપૂર્ણપણે સુરક્ષિત

જ્યારે પણ કોઈ કંપની બીજી કંપનીને ખરીદે છે, ત્યારે સૌથી મોટો ડર કર્મચારીઓને છૂટા કરવાનો હોય છે. પરંતુ પ્રેમ વત્સાએ સ્પષ્ટ કર્યું છે કે IDBI બેંકમાંથી કોઈ પણ કર્મચારીને કાઢવામાં નહીં આવે. કર્મચારીઓના પગાર, સેવાની શરતો અને અન્ય લાભો પહેલાની જેમ જ ચાલુ રહેશે.

વત્સાએ કહ્યું, "અમે ક્યારેય અમારા 5% કે 10% કર્મચારીઓને નોકરીમાંથી કાઢ્યા નથી. અમે તેમની સાથે મળીને કામ કરીશું. કોરોના કાળમાં પણ અમે કોઈનો બોનસ કે પગાર કાપ્યો ન હતો, અને કોઈને નોકરીમાંથી કાઢ્યા ન હતા. વિકાસની નવી તકો માટે અમને હજુ વધુ નવા લોકોની જરૂર પડશે."

IDBI બેંક માટે શું છે નવો પ્લાન?

બેંકના ભવિષ્ય વિશે વાત કરતા પ્રેમ વત્સાએ જણાવ્યું કે, 'ગો ડિજિટ' મારફતે પ્રોપર્ટી અને લાઈફ ઈન્સ્યોરન્સની સુવિધા હવે સીધી IDBI બેંક સાથે જોડાઈ જશે. આ ઉપરાંત, IIFL ની વેલ્થ મેનેજમેન્ટ અને ઈન્વેસ્ટમેન્ટ બેન્કિંગ સેવાઓનો પણ બેંકને લાભ મળશે. હાલમાં બેંકની 2000 જેટલી શાખાઓ છે. ભૂતકાળમાં કેટલીક મુશ્કેલીઓના કારણે બેંકનો ફેલાવો અટકી ગયો હતો, પરંતુ હવે તે તમામ પડકારો દૂર થઈ ગયા છે.