ઇઝરાયેલ-ઈરાન યુદ્ધની મોટી અસર: ભારતીય ફાર્મા કંપનીઓને માત્ર એક જ મહિનામાં 5000 કરોડના નુકસાનનો ડર

Indian pharma exporters: ઇઝરાયેલ અને ઈરાન વચ્ચે ચાલી રહેલા યુદ્ધની સીધી અને ગંભીર અસર હવે ભારતના દવા ઉદ્યોગ (ફાર્મા સેક્ટર) પર પડી રહી છે. મિડલ ઈસ્ટ (પશ્ચિમ એશિયા) માં તણાવ વધવાથી માલભાડા એટલે કે ફ્રેટ રેટમાં બમણો વધારો જોવા મળ્યો છે. આ સ્થિતિને કારણે માત્ર આ મહિનામાં જ ભારતીય ફાર્મા નિકાસકારોને અંદાજે 2500 થી 5000 કરોડ રૂપિયાનું મોટું નુકસાન થવાની ભીતિ સેવાઈ રહી છે.

લોજિસ્ટિક્સ ખર્ચમાં તોતિંગ વધારો

ખાડી દેશો અને વેસ્ટ એશિયાના માર્કેટ પર આધાર રાખતી દવા બનાવતી કંપનીઓ માટે અત્યારે મુશ્કેલીનો સમય છે. ફાર્માસ્યુટિકલ્સ એક્સપોર્ટ પ્રમોશન કાઉન્સિલ ઓફ ઇન્ડિયા (ફાર્મેક્સિલ) દ્વારા અપાયેલી ચેતવણી મુજબ, નિકાસકારોએ હવે દરેક શિપમેન્ટ દીઠ 4000 થી 8000 ડોલર જેટલો ભારે સરચાર્જ ચૂકવવો પડી રહ્યો છે. શિપમેન્ટ માટે લાંબા રૂટ લેવા, ઇંધણના વધેલા ભાવ અને હાઈ ઇન્સ્યોરન્સ પ્રીમિયમના કારણે આ ખર્ચમાં મોટો ઉછાળો આવ્યો છે.

કાચા માલ અને મૂડી પર ભારે દબાણ

ફાર્મેક્સિલના ચેરમેન નમિત જોશીએ આ અંગે ચિંતા વ્યક્ત કરતા જણાવ્યું હતું કે, કાચા તેલ (ક્રૂડ ઓઈલ) ના ઊંચા ભાવ અને શિપમેન્ટ પહોંચવાના અનિશ્ચિત સમયને કારણે API (દવા બનાવવા માટેનો કાચો માલ) ખરીદવાનો ખર્ચ વધી ગયો છે. વળી, ઇન્વેન્ટરી સાચવવાની મુશ્કેલીઓ પણ વધી છે. આનાથી મોટી અને મધ્યમ કદની ફાર્મા કંપનીઓની વર્કિંગ કેપિટલ સાયકલ (કાર્યકારી મૂડી) પર ભારે દબાણ આવી ગયું છે.

ક્રૂડના ભાવ અને યુદ્ધની વર્તમાન સ્થિતિ

પ્રાપ્ત માહિતી અનુસાર, 28 ફેબ્રુઆરી 2026 ના રોજ ઇઝરાયેલ અને અમેરિકાએ ઈરાન સામે સીધા હુમલાની શરૂઆત કરીને એર સ્ટ્રાઈક કરી હતી. ત્યારથી બ્રેન્ટ ક્રૂડના ભાવમાં 16 ટકા જેટલો ઉછાળો આવ્યો છે અને 6 માર્ચની સવારે તે 84 ડોલર પ્રતિ બેરલની આસપાસ ટ્રેડ કરી રહ્યું હતું. સામે પક્ષે ઈરાને પણ વળતો પ્રહાર કરીને ઇઝરાયેલ અને મધ્યપૂર્વના અન્ય દેશોમાં હુમલા કર્યા છે.