રમેશ દામાણીની એન્ટ્રીથી આ Smallcap શેરમાં તેજીનું તોફાન: 2 દિવસમાં ભાવ 14% ઉછળ્યો, જાણો ડિટેલ્સ

Smallcap Stocks: ભારતીય શેરબજારમાં મોટા ગજાના રોકાણકારો જ્યારે કોઈ કંપનીમાં રોકાણ કરે છે, ત્યારે સામાન્ય રોકાણકારોનું ધ્યાન પણ તે શેર તરફ ખેંચાય છે. તાજેતરમાં શેરબજારના પીઢ રોકાણકાર રમેશ દામાણી (Ramesh Damani) એ એક સ્મોલકેપ કંપનીમાં મોટું રોકાણ કર્યું છે. આ સમાચાર બહાર આવતાની સાથે જ 'જોન કોકરિલ ઈન્ડિયા લિમિટેડ' (John Cockerill India) ના શેરોમાં જબરદસ્ત તેજી જોવા મળી છે. છેલ્લા 2 દિવસમાં જ આ કંપનીના શેરના ભાવમાં આશરે 13.5% જેટલો ઉછાળો નોંધાયો છે. આજે 29 ડિસેમ્બરના રોજ ટ્રેડિંગ સેશન દરમિયાન પણ શેરમાં ખરીદીનો માહોલ જોવા મળ્યો હતો અને શેર 6% થી વધુ વધીને 5,420 રૂપિયાના લેવલ પર પહોંચી ગયો હતો. શુક્રવારે પણ આ સ્ટોકમાં 6.5% ની મજબૂત તેજી જોવા મળી હતી.

ડીલની વિગતો અને રોકાણનું મૂલ્ય

BSE પર ઉપલબ્ધ ડેટા અનુસાર, રમેશ દામાણીએ ગયા અઠવાડિયે એક બ્લોક ડીલ (Block Deal) મારફતે જોન કોકરિલ ઈન્ડિયામાં હિસ્સેદારી ખરીદી છે. તેમણે કંપનીના કુલ 27,500 શેર ખરીદ્યા છે. આ સોદો આશરે 4,700 રૂપિયા પ્રતિ શેરના ભાવે થયો હતો. ગણતરી કરીએ તો, રમેશ દામાણી દ્વારા કરવામાં આવેલા આ રોકાણની કુલ કિંમત લગભગ 13 કરોડ રૂપિયા થાય છે. મહત્વની વાત એ છે કે, આ ટ્રાન્ઝેક્શનમાં કંપનીના પ્રમોટર 'John Cockerill SA' એ તેમની હિસ્સેદારીનો અમુક ભાગ વેચ્યો હતો, જે દામાણીએ ખરીદ્યો છે.

કંપની શું બિઝનેસ કરે છે?

કોઈપણ શેરમાં રોકાણ કરતા પહેલા કંપનીના કામકાજ વિશે જાણવું જરૂરી છે. John Cockerill India મુખ્યત્વે ઈન્ડસ્ટ્રીયલ ઈક્વિપમેન્ટ અને કમ્પોનન્ટ્સ (Industrial Equipment) બનાવવાનું કામ કરે છે. કંપની કોલ્ડ રોલિંગ મિલ કોમ્પ્લેક્સ અને પ્રોસેસિંગ લાઈન્સની ડિઝાઈન, મેન્યુફેક્ચરિંગ અને કમિશનિંગ સાથે સંકળાયેલી છે. આ ઉપરાંત, કંપની ભવિષ્યને ધ્યાનમાં રાખીને એનર્જી ટ્રાન્ઝિશન (Energy Transition) સાથે જોડાયેલી ટેકનોલોજી પર પણ કામ કરી રહી છે, જે તેને ફ્યુચર રેડી બનાવે છે.

શેરહોલ્ડિંગ પેટર્ન અને રોકાણકારો

કંપનીના સપ્ટેમ્બર ક્વાર્ટરના શેરહોલ્ડિંગ પેટર્ન પર નજર કરીએ તો, આ તાજેતરના વેચાણ પહેલા કંપનીમાં પ્રમોટર્સની હિસ્સેદારી 75% હતી. રમેશ દામાણીનું નામ અગાઉ પબ્લિક શેરહોલ્ડર્સના લિસ્ટમાં ન હતું, જેનો અર્થ એ છે કે પહેલા તેમની પાસે કોઈ હિસ્સો ન હતો અથવા તો તે 1%થી ઓછો હશે. કંપનીમાં નાના એટલે કે રિટેલ રોકાણકારો (જેમનું રોકાણ 2 લાખથી ઓછું હોય)નો હિસ્સો લગભગ 15.9% છે. જ્યારે મ્યુચ્યુઅલ ફંડ્સ અને વિદેશી રોકાણકારો (FPI) ની હિસ્સેદારી કંપનીમાં નહિવત બરાબર છે.