SpiceJet share price : સુપ્રીમ કોર્ટ તરફથી સ્પાઇસજેટને મોટી રાહત, શેર્સ 5%થી વધુ વધ્યા

SpiceJet share price : સ્પાઇસજેટના શેર આજે ઝડપથી વધી રહ્યા છે. હકીકતમાં, સુપ્રીમ કોર્ટે 2015ના એક કેસમાં કંપનીની તરફેણમાં ચુકાદો આપ્યો છે. સુપ્રીમ કોર્ટે કંપનીની તરફેણમાં ચુકાદો આપતા દિલ્હી હાઇકોર્ટના નિર્ણયને સમર્થન આપ્યું છે. દિલ્હી હાઇકોર્ટે તેના ચુકાદામાં KAL એરવેઝના 1300 કરોડ રૂપિયાના દાવાને ફગાવી દીધો હતો. એટલે કે, સ્પાઇસજેટને રાહત આપતા, સુપ્રીમ કોર્ટે દિલ્હી હાઇકોર્ટના આદેશને સમર્થન આપ્યું છે, જેણે મારનની માલિકીની KAL એરવેઝની અરજીમાં એરલાઇન સામે રુપિયા 1,300 કરોડના દાવાને ફગાવી દીધો હતો.

એરલાઇનને રાહત આપતાં, ન્યાયાધીશ પામિદિઘંથમ શ્રી નરસિંહા અને અતુલ એસ ચાંદુરકરની બેન્ચે કહ્યું, "બંને સ્પેશિયલ લીવ પિટિશન ફગાવી દેવામાં આવે છે." મારનની માલિકીની KAL એરવેઝે દિલ્હી હાઇકોર્ટના આદેશને પડકારતા સુપ્રીમ કોર્ટમાં અરજી કરી હતી, જેમાં શેર ટ્રાન્સફર વિવાદમાં સ્પાઇસજેટ સામેના નુકસાન માટેના દાવાને ફગાવી દેવામાં આવ્યો હતો.

એરલાઇને મે મહિનામાં કહ્યું હતું કે, "આ દાવાઓની સંપૂર્ણ તપાસ કરવામાં આવી હતી અને બાદમાં સુપ્રીમ કોર્ટના ત્રણ નિવૃત્ત ન્યાયાધીશોની પેનલ દ્વારા તેને નકારી કાઢવામાં આવ્યો હતો. ત્યારબાદ, KAL એરવેઝ અને કલાનિધિ મારને દિલ્હી હાઇકોર્ટની સિંગલ જજ બેન્ચમાં અપીલ કરી હતી અને રુપિયા 1300 કરોડનું નુકસાન માંગ્યું હતું, જેને કોર્ટે પણ નકારી કાઢ્યું હતું."

2015નો  શું છે આ મામલો ?

કલાનિધિ મારન અને KAL એરવેઝે સ્પાઇસજેટમાં તેમનો હિસ્સો ટ્રાન્સફર કર્યો હતો. તેમણે તેમનો હિસ્સો સ્થાપક અજય સિંહને ટ્રાન્સફર કર્યો હતો. 58.46 ટકા હિસ્સો ટ્રાન્સફર કરવામાં આવ્યો હતો. મારન અને KAL એરવેઝે દાવો કર્યો હતો કે તેમણે વોરંટ અને પ્રેફરન્સ શેર માટે રુપિયા 1300 કરોડ ચૂકવ્યા હતા. રકમ ચૂકવ્યા પછી પણ તેમને શેર મળ્યા ન હતા.

સ્પાઇસજેટની નાણાકીય સ્થિતિની વાત કરીએ તો, આ વર્ષે માર્ચ સુધીમાં કંપની પર 4214 કરોડ રૂપિયાનું દેવું હતું. કંપની નાણાકીય પડકારો અને વિમાનોના ગ્રાઉન્ડિંગની સમસ્યાનો સામનો કરી રહી છે. આ કારણે, તેનો બજાર હિસ્સો ઘટી ગયો છે. એરલાઇન ક્રેડિટ સુઇસ સહિત અન્ય કંપનીઓ સાથે દેવાના વિવાદમાં પણ ફસાયેલી છે, જેના માટે તેને ચૂકવણી કરવાનો આદેશ આપવામાં આવ્યો છે.

આ પણ વાંચો-Closing Bell: ભારતીય શેરબજારમાં સકારાત્મક માહોલ, સેન્સેક્સ 540 પોઈન્ટ વધ્યો, નિફ્ટી 25,200 પર બંધ, મેટલ શેર્સ રહ્યા તેજીમાં