Sun Pharma Q1 Results: સન ફાર્માના નફામાં 27%નો જોરદાર ઉછાળો, જાણો શેર બજારમાં કેમ જોવા મળ્યો ઘટાડો?

સન ફાર્માના દવાઓના વેચાણની વાત કરીએ તો, ભારતીય બજારમાં કંપનીએ શાનદાર પ્રદર્શન કર્યું છે, પરંતુ અમેરિકન બજારમાં થોડી નિરાશા મળી છે.

ભારત: ભારતમાં કંપનીનું વેચાણ 16 ટકાના ગ્રોથ સાથે 5474.9 કરોડ રહ્યું છે. કંપનીના કુલ વેચાણમાં ભારતનો હિસ્સો 36.1 ટકા રહ્યો છે.

અમેરિકા: બીજી તરફ, US માર્કેટમાં વેચાણ 9.7 ટકા ઘટીને 42.7 કરોડ ડોલર રહ્યું છે. કુલ વેચાણમાં US નો હિસ્સો 26.6 ટકા રહ્યો છે.

ગ્લોબલ માર્કેટ: સન ફાર્માની ગ્લોબલ ઇનોવેટિવ દવાઓનું વેચાણ 12.8 ટકા વધીને 35.1 કરોડ ડોલર નોંધાયું છે, જે કુલ વેચાણનો 21.9 ટકા હિસ્સો ધરાવે છે.

ઓર્ગેનનના અધિગ્રહણ અંગે મોટા સમાચાર

સન ફાર્માના મેનેજિંગ ડિરેક્ટર કીર્તિ ગનોર્કરે કંપનીના ભવિષ્યના પ્લાન વિશે માહિતી આપતા જણાવ્યું હતું કે, ઓર્ગેનન કંપનીના શેરહોલ્ડર્સે સન ફાર્મા દ્વારા સૂચવવામાં આવેલા અધિગ્રહણને લીલી ઝંડી આપી દીધી છે.

આ ડીલ 2027 ની શરૂઆત સુધીમાં પૂરી થઈ જવાની પૂરી શક્યતા છે. આ એગ્રીમેન્ટ મુજબ, સન ફાર્મા 1175 કરોડ ડોલરની એન્ટરપ્રાઇઝ વેલ્યુ પર ઓર્ગેનનની 100 ટકા ઇક્વિટી ખરીદી લેશે. આ ડીલ સન ફાર્માની એક સબસિડિયરી અને ઓર્ગેનન વચ્ચેના વિલય દ્વારા પૂરી કરવામાં આવશે.

શેર બજારમાં સન ફાર્માની સ્થિતિ

શાનદાર રિઝલ્ટ છતાં 31 જુલાઈના રોજ BSE પર સન ફાર્માનો શેર 0.60 ટકાના ઘટાડા સાથે 1989.35 રૂપિયા પર બંધ થયો હતો. હાલમાં કંપનીનું કુલ માર્કેટ કેપ 4.77 લાખ કરોડ રૂપિયા છે. આ શેરની ફેસ વેલ્યુ 1 રૂપિયો છે. રોકાણકારો માટે ખુશીની વાત એ છે કે છેલ્લા 6 મહિનામાં આ શેરમાં 25 ટકાનો ઉછાળો જોવા મળ્યો છે. શેરનો 52 સપ્તાહનો હાઈ 2047.55 રૂપિયા અને લો 1547.25 રૂપિયા છે. જૂન 2026 ના અંત સુધીના આંકડા મુજબ, કંપનીમાં પ્રમોટર્સની હિસ્સેદારી 54.48 ટકા જેટલી છે.

સન ફાર્માનું આ ક્વાર્ટરનું રિઝલ્ટ સાબિત કરે છે કે ભારતીય માર્કેટમાં કંપનીની પકડ ખૂબ જ મજબૂત છે. ઓર્ગેનન સાથેની નવી ડીલ ભવિષ્યમાં કંપનીને ગ્લોબલ લેવલ પર વધુ મજબૂતી પ્રદાન કરશે. જોકે, અમેરિકન બજારમાં ઘટેલું વેચાણ કંપની માટે આવનારા સમયમાં એક પડકાર બની શકે છે. શેર બજારના રોકાણકારોની નજર હવે કંપનીના આગામી પગલાંઓ પર રહેશે.

આ પણ વાંચો- Market Outlook : 3 ઓગસ્ટે શેરબજારની ચાલ કેવી રહેશે? નિફ્ટીમાં સતત ત્રીજા દિવસે તેજી, જાણો માર્કેટ એક્સપર્ટ્સનો શું છે મત

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.