વીજળીની વધતી માંગ વચ્ચે દેશના 40% પાવર પ્લાન્ટ્સમાં કોલસાનો સ્ટોક તળિયે, જાણો શું સર્જાશે વીજ સંકટ?

Coal stock in India: દેશમાં વધતી ગરમી અને અલ નિનોની અસરને કારણે વીજળીની માંગમાં જબરદસ્ત ઉછાળો આવ્યો છે. આ વધતી માંગને પહોંચી વળવા માટે કોલસાનો વપરાશ ખૂબ જ વધી ગયો છે. પરિણામે, હાલમાં દેશના 40% જેટલા કોલસા આધારિત પાવર પ્લાન્ટ્સ વીજ ઉત્પાદન એકમોમાં કોલસાનો સ્ટોક ચિંતાજનક રીતે ઘટીને તળિયે પહોંચી ગયો છે.

74 પ્લાન્ટ્સમાં કોલસાનો સ્ટોક 25% થી ઓછો

સરકારી આંકડાઓ મુજબ, જે પાવર પ્લાન્ટ્સમાં કોલસાની આવશ્યક ઈન્વેન્ટરી 25% કરતા ઓછી છે, તેમની સંખ્યા ગયા સપ્તાહના અંતે વધીને 74 થઈ ગઈ છે. અગાઉ 12 સપ્ટેમ્બરના સપ્તાહના અંતે આ આંકડો 60 હતો. આ દર્શાવે છે કે માત્ર થોડા જ દિવસોમાં કોલસાના સ્ટોકમાં ઝડપી ઘટાડો નોંધાયો છે. એસી અને કુલિંગ સાધનોના સતત વપરાશને કારણે આ સ્થિતિ સર્જાઈ છે.

વીજળીની માંગમાં ઐતિહાસિક વધારો

ગયા સપ્તાહમાં દેશમાં વીજળીની મહત્તમ માંગ 230 થી 250 ગીગાવોટ (GW) ની વચ્ચે રહી હતી. આ પહેલા મે મહિનામાં વીજળીની માંગ 270.70 ગીગાવોટ સુધી પહોંચી ગઈ હતી, જે અત્યાર સુધીનો ઓલ-ટાઇમ હાઈ રેકોર્ડ છે.

શું દેશમાં વીજ સંકટ સર્જાશે?

આ પરિસ્થિતિ જોતા સામાન્ય લોકોને વીજ કાપનો ડર સતાવી રહ્યો છે, પરંતુ એક રિસર્ચ ફર્મના રિપોર્ટ મુજબ આ કોઈ કાયમી કે મૂળભૂત અછત નથી. આ માત્ર એક કામચલાઉ લોજિસ્ટિક્સ સમસ્યા છે. તાજેતરમાં ભારે વરસાદને કારણે ખાણોમાંથી પાવર પ્લાન્ટ્સ સુધી કોલસો પહોંચાડવામાં ખલેલ પડી હતી. જોકે, કોલસા અને રેલવે મંત્રાલયે સ્પષ્ટતા કરી છે કે હવે સપ્લાયમાં સુધારો થઈ રહ્યો છે અને પુરવઠો ધીમે ધીમે પૂર્વવત થઈ રહ્યો છે.