તહેવારોની સિઝનમાં ડુંગળીના ભાવ આસમાને: સરકારની કાંદા એક્સપ્રેસ છતાં 80 રૂપિયા કિલોએ પહોંચ્યો ભાવ, જાણો લેટેસ્ટ અપડેટ

onion price hike: નવરાત્રીનો પવિત્ર તહેવાર ચાલી રહ્યો છે. સામાન્ય રીતે આ દિવસોમાં ઘણા ઘરોમાં ડુંગળી અને લસણ ખાવાનું ટાળવામાં આવે છે, જેના કારણે બજારમાં તેની માંગ ઘટે છે અને ભાવમાં ઘટાડો જોવા મળે છે. પરંતુ આ વર્ષે ચિત્ર સાવ ઊલટું છે. તહેવારોની આ સિઝનમાં ભાવ ઘટવાના બદલે ડુંગળી અને લસણના ભાવમાં આગ ઝરતી તેજી જોવા મળી રહી છે.

સરકારના પ્રયાસો અને બજારની વાસ્તવિકતા

વધતી કિંમતોને કાબૂમાં લેવા માટે સરકારે પોતાના બફર સ્ટોકમાંથી ડુંગળી બજારમાં ઉતારી છે. આખા દેશમાં 'કાંદા એક્સપ્રેસ' ટ્રેનો અને ટ્રકો દ્વારા અલગ-અલગ શહેરોમાં ડુંગળીની સપ્લાય કરવામાં આવી રહી છે. આમ છતાં, સરકારની આ નીતિની કોઈ ખાસ અસર બજાર પર દેખાઈ રહી નથી. દેશના અનેક શહેરોમાં ડુંગળી હજુ પણ 70 થી 80 રૂપિયા પ્રતિ કિલોના ભાવે વેચાઈ રહી છે. ખાસ કરીને સ્વિગી ઇન્સ્ટામાર્ટ, ઝેપ્ટો અને ફ્લિપકાર્ટ મિનિટ્સ જેવી ક્વિક ઈ-કોમર્સ સાઇટ્સ પર કિંમતોમાં મોટો ઉછાળો જોવા મળી રહ્યો છે. અહીં ડુંગળી 70થી 80 રૂપિયાની રેન્જમાં મળી રહી છે.

કેમ વધી રહ્યા છે ભાવ?

આ વર્ષે અલ નીનોની અસરને કારણે વરસાદ અપેક્ષા કરતા ઘણો ઓછો પડ્યો છે. ખરાબ હવામાન અને ઓછા વરસાદની સીધી અસર પાકના ઉત્પાદન પર પડી છે. ઉત્પાદન ઘટવાને કારણે ખેડૂતો પણ પરેશાન છે અને બજારમાં માલની શોર્ટેજ ઉભી થતા ભાવ આસમાને પહોંચ્યા છે.

તહેવારોમાં સામાન્ય જનતા પર મોંઘવારીનો માર

માત્ર ડુંગળી કે લસણ જ નહીં, પરંતુ તહેવારોની સિઝનમાં ખાંડ, ખાદ્ય તેલ અને દાળના ભાવમાં પણ મોટો વધારો થયો છે. તહેવારોમાં મીઠાઈ અને ફરસાણની માંગ વધે છે, ત્યારે આ રીતે જીવનજરૂરી ખાદ્ય પદાર્થો મોંઘા થતા સામાન્ય જનતાના રસોડાનું બજેટ ખોરવાઈ ગયું છે અને મોંઘવારી મોટી પરેશાની બની ગઈ છે.