Adani Power Q1 Results: અદાણી પાવરને થયો 4806 કરોડનો બમ્પર નફો, ઐતિહાસિક રિઝલ્ટ સાથે કંપની બજારમાંથી ઉઠાવશે 15000 કરોડ

Adani Power Q1 Results: અદાણી ગ્રુપની વીજળી કંપની અદાણી પાવરએ જૂન ક્વાર્ટરમાં અત્યાર સુધીનું સૌથી શાનદાર પ્રદર્શન કર્યું છે. દેશમાં વીજળીની રેકોર્ડ માંગ, વધુ વેચાણ અને સારા ટેરિફના કારણે કંપનીનો નફો, રેવન્યુ અને ઓપરેટિંગ પ્રોફિટ ત્રણેય ઐતિહાસિક ટોચ પર પહોંચી ગયા છે.

Q1 રિઝલ્ટના મુખ્ય આંકડાઓ પર એક નજર

એપ્રિલ-જૂન ક્વાર્ટરમાં કંપનીએ નાણાકીય મોરચે જોરદાર છલાંગ લગાવી છે, કંપનીનો કન્સોલિડેટેડ ચોખ્ખો નફો 42% વધીને 4,806 કરોડ રૂપિયા થઈ ગયો છે. ગયા વર્ષે આ જ ક્વાર્ટરમાં નફો 3,385 કરોડ રૂપિયા હતો. ઓપરેશન્સમાંથી થતી આવક 34% ના ઉછાળા સાથે 18,902 કરોડ રૂપિયા પર પહોંચી ગઈ છે (જે એક વર્ષ પહેલા 14,109 કરોડ રૂપિયા હતી). કંપનીનો ઓપરેટિંગ નફો લગભગ 40% વધીને 7,948 કરોડ રૂપિયાના રેકોર્ડ સ્તરે પહોંચ્યો છે. આ સાથે EBITDA માર્જિન 40.3% થી વધીને 42% થઈ ગયું છે.

ભારે ગરમી અને મોંઘી વીજળી બની કમાણીનું મુખ્ય કારણ

આ વર્ષે પડેલી કાળઝાળ ગરમીને કારણે વીજળીની માંગ રેકોર્ડ સ્તરે પહોંચી હતી. મે મહિનામાં દેશની પીક પાવર ડિમાન્ડ 270.8 ગીગાવોટ રહી હતી.આ તકનો પૂરો ફાયદો અદાણી પાવરને મળ્યો. કંપનીએ આ ક્વાર્ટરમાં 31 બિલિયન યુનિટ વીજળીનું ઉત્પાદન કર્યું, જે અત્યાર સુધીનો સૌથી મોટો આંકડો છે. લાંબા ગાળાના PPA હેઠળ સરેરાશ ટેરિફ 8.5% વધીને 5.95 રૂપિયા પ્રતિ યુનિટ થયો છે. શોર્ટ ટર્મ માર્કેટમાં પણ કંપનીને 13.1% ના વધારા સાથે સરેરાશ 7.04 રૂપિયા પ્રતિ યુનિટનો ભાવ મળ્યો છે.

કોલસો મોંઘો થયો, છતાં નફામાં કેવી રીતે થયો વધારો?

વધુ વીજળી ઉત્પાદન અને આયાતી કોલસાના ઊંચા ભાવને કારણે કંપનીનો ઈંધણ ખર્ચ 30% વધીને 9,513 કરોડ રૂપિયા થઈ ગયો હતો. આમ છતાં, બેહતર ઓપરેટિંગ એફિશિયન્સી અને ફાઇનાન્સ કોસ્ટ પર મજબૂત કંટ્રોલના કારણે નફામાં વધારો થયો છે. આ ઉપરાંત, કંપનીને 1,386 કરોડ રૂપિયાની જૂની આવક અને વધારાના કોલસાના ખર્ચ પેટે 898 કરોડ રૂપિયાનું વળતર પણ મળ્યું છે.