શેરબજારમાં ભૂકંપ વચ્ચે Defence Stocksની ચમક વધી! Paras Defence અને ideaForge 13% ઉછળ્યા, જાણો માર્કેટની સ્થિતિ

Defence Stocks: મિડલ ઈસ્ટમાં ચાલી રહેલા યુદ્ધની સીધી અસર ભારતીય શેરબજાર પર જોવા મળી રહી છે. એક તરફ માર્કેટમાં ભારે કડાકો બોલી ગયો છે અને મિડકેપ તેમજ સ્મોલકેપ શેરોની ભારે પીટાઈ થઈ રહી છે. પરંતુ આ હાહાકાર વચ્ચે પણ ડિફેન્સ કંપનીઓના શેરો (Defence Stocks)માં 13% સુધીનો જંગી ઉછાળો જોવા મળ્યો છે. ચાલો જાણીએ કે અત્યારે ગ્લોબલ માર્કેટમાં શું સ્થિતિ છે અને આ શેરો કેમ રોકેટ બની ગયા છે.

માર્કેટમાં કડાકો, પણ ડિફેન્સ શેરમાં તેજી

આજે ઘરેલુ શેરબજારમાં વેચવાલીનું ભારે દબાણ જોવા મળ્યું. સેન્સેક્સ (Sensex) 2700 પોઈન્ટથી વધુનો ગોથું ખાઈને 78550ની નીચે 78543.73ના સ્તર પર આવી ગયો. જ્યારે નિફ્ટી 50 (Nifty 50) પણ 1.5 ટકાથી વધુ તૂટીને 24650ની નીચે 24645.10 પર પહોંચી ગયો હતો. જોકે, આશ્ચર્યની વાત એ હતી કે શરૂઆતી કારોબારમાં જ્યારે આખું માર્કેટ લાલ નિશાનમાં હતું, ત્યારે સેન્સેક્સનો એકમાત્ર શેર લીલા નિશાનમાં હતો - અને તે હતો BEL (ભારત ઈલેક્ટ્રોનિક્સ લિમિટેડ), જે એક ડિફેન્સ સ્ટોક છે.

મિડલ ઈસ્ટમાં અત્યારે કેવો છે માહોલ?

અમેરિકન હુમલામાં ઈરાનના સુપ્રીમ લીડર ખામેનેઈની હત્યાના બદલામાં હવે હિઝબુલ્લાહે ઈઝરાયેલ પર વળતો હુમલો કર્યો છે. હિઝબુલ્લાહે દાવો કર્યો છે કે તેણે ઈઝરાયેલ પર રોકેટ અને ડ્રોનથી હુમલા કર્યા છે. બીજી બાજુ, ઈઝરાયેલની સેનાનું કહેવું છે કે તેણે લેબનોનના બેરૂત અને દક્ષિણ વિસ્તારમાં હિઝબુલ્લાહના સિનિયર કમાન્ડરો પર એટેક કર્યો છે. ઈરાન, અમેરિકા અને ઈઝરાયેલ વચ્ચેની આ લડાઈ હવે આખા મિડલ ઈસ્ટમાં ફેલાઈ ચૂકી છે અને એક મોટા યુદ્ધનું રૂપ લઈ રહી છે.

શા માટે વધી ડિફેન્સ શેરોની ચમક?

જ્યારે પણ વિશ્વમાં યુદ્ધ જેવો માહોલ બને છે, ત્યારે ડિફેન્સ (સંરક્ષણ) ઉપકરણો અને તેને બનાવવા માટે જરૂરી પાર્ટ્સની માંગમાં અચાનક વધારો થાય છે. આ જ કારણથી જિયોપોલિટિકલ ટેન્શન વધતા Paras Defence અને ideaForge Technology જેવી દિગ્ગજ ભારતીય ડિફેન્સ કંપનીઓના શેરમાં 13% સુધીનો તોતિંગ ઉછાળો જોવા મળ્યો. આ ઉપરાંત, Bharat Dynamics અને Data Patterns ના શેર પણ 3 થી 4% જેટલા વધ્યા છે.