ઓલા ઇલેક્ટ્રિક ફરી મુશ્કેલીમાં, સરકારે આપ્યા તપાસના આદેશ, જાણો સમગ્ર મામલો

ઇલેક્ટ્રિક ટુ-વ્હીલર ઉત્પાદક ઓલા ઇલેક્ટ્રિક ફરી એકવાર મુશ્કેલીમાં મુકાઈ રહી હોય તેવું લાગે છે. ઓલા ઇલેક્ટ્રિક દ્વારા પૂરા પાડવામાં આવેલા વેચાણના આંકડા વ્હીકલ નોંધણીના આંકડાઓથી અલગ હોવાનું જાણવા મળ્યું છે. આ બાબતની ગંભીરતાને ધ્યાનમાં રાખીને, ભારત સરકારના ભારે ઉદ્યોગ મંત્રાલયે ઓટોમોટિવ રિસર્ચ એસોસિએશન ઓફ ઈન્ડિયા (ARAI)ને તપાસ કરવાનો નિર્દેશ આપ્યો છે. ભારે ઉદ્યોગ મંત્રાલયે ઓલા સામે મળેલી કસ્ટમર્સની ફરિયાદોની તપાસનો પણ આદેશ આપ્યો છે. સૂત્રોએ જણાવ્યું હતું કે મંત્રાલયે ARAI ને 15 દિવસની અંદર તપાસ રિપોર્ટ સબમિટ કરવાનો નિર્દેશ આપ્યો છે.

સરકારી યોજનાઓનો લાભ લઈ રહી છે ઓલા ઇલેક્ટ્રિક

ફેબ્રુઆરીમાં ઓલા ઇલેક્ટ્રિકના વ્હીકલ પોર્ટલ પર કુલ 8,652 રજિસ્ટ્રેશન થયા હતા. જ્યારે કંપનીએ ફેબ્રુઆરીમાં 25,000થી વધુ વ્હીકલોનું વેચાણ નોંધાવ્યું હતું. 20 માર્ચ સુધીમાં વ્હીકલ પોર્ટલ પર કંપનીના રજીસ્ટ્રેશન 11,781 હતા. આપને જણાવી દઈએ કે ભાવેશ અગ્રવાલની કંપની ઓલા ઇલેક્ટ્રિક EVને પ્રોત્સાહન આપતી સરકારી યોજના FAME-2 અને PM E-Drive યોજનાઓનો લાભાર્થી છે. મંત્રાલયના વહીવટી નિયંત્રણ હેઠળની પ્રમાણપત્ર અને પરીક્ષણ એજન્સી, ARAI એ પાત્રતા પ્રમાણપત્ર જારી કર્યું છે.

સરકારી યોજનાના નિયમોનું પાલન થાય છે તેની ખાતરી કરવાની જવાબદારી ARAIની

અધિકારીઓના મતે “પીએમ ઇ-ડ્રાઇવ યોજનાની ગાઇડલાઇનનું પાલન સુનિશ્ચિત કરવાની જવાબદારી ARAI ની છે. ARAI કંપનીના વેચાણ ડેટા અને કસ્ટમર્સની ફરિયાદોમાં થતી અનિયમિતતાઓની પણ તપાસ કરશે. અમે એજન્સીને 15 દિવસની અંદર રિપોર્ટ રજૂ કરવા કહ્યું છે.” સરકારના આ પગલા અંગે ટિપ્પણી માટે સંપર્ક કરવામાં આવતા, ઓલા ઇલેક્ટ્રિકે કોઈ નિવેદન આપવાનો ઇનકાર કર્યો. ઓલા ઇલેક્ટ્રિક અનેક નિયમનકારી દબાણનો સામનો કરી રહી છે.

ભાવિશ અગ્રવાલની કંપની ઘણા અધિકારીઓના રડાર પર

ગ્રાહક અધિકાર નિયમનકાર CCPA સહિત અનેક સત્તાવાળાઓ, ઓલા ઇલેક્ટ્રિકની સેવા અને વ્હીકલોમાં કથિત "ખામીઓ" સંબંધિત ફરિયાદોની તપાસનો આદેશ આપી રહ્યા છે. ગયા અઠવાડિયે, ઓલા ઇલેક્ટ્રિક મોબિલિટી લિમિટેડે જણાવ્યું હતું કે તેની વ્હીકલ નોંધણી સેવા પ્રદાતા રોઝમેર્ટા ડિજિટલ સર્વિસીસ લિમિટેડે પેટાકંપની ઓલા ઇલેક્ટ્રિક ટેકનોલોજી પ્રાઇવેટ લિમિટેડ સામે નાદારીની કાર્યવાહી શરૂ કરવાની માંગ કરી છે.