Tata Communications Q1 Results: ટાટા ગ્રુપની આ કંપનીનો નફો 29% ઘટ્યો, પરિણામ આવતા જ શેર 8% તૂટ્યો, રોકાણકારોને મોટો ઝટકો

Tata Communications Q1 Results: શેરબજારમાં ટાટા ગ્રુપની જાણીતી ટેલિકોમ અને ડિજિટલ ઈન્ફ્રાસ્ટ્રક્ચર કંપની ટાટા કોમ્યુનિકેશન્સના રોકાણકારોને મોટો આંચકો લાગ્યો છે. કંપનીએ તેના જૂન ક્વાર્ટરના પરિણામો જાહેર કર્યા છે, જે બજારની અપેક્ષા મુજબના રહ્યા નથી. નફામાં મોટો ઘટાડો નોંધાતા બુધવારે ટ્રેડિંગ સેશન દરમિયાન કંપનીનો શેર લગભગ 8% જેટલો તૂટી ગયો હતો. જોકે, બાદમાં તેમાં થોડી રિકવરી જોવા મળી હતી.

નફામાં કેમ આવ્યો આટલો મોટો ઘટાડો?

એપ્રિલ-જૂન ક્વાર્ટરમાં કંપનીનો કન્સોલિડેટેડ ચોખ્ખો નફો 29% ઘટીને 134 કરોડ રૂપિયા થઈ ગયો છે. ગયા વર્ષે આ જ સમયગાળામાં કંપનીનો નફો 190 કરોડ રૂપિયા હતો.નફામાં થયેલા આ મોટા ઘટાડા પાછળનું મુખ્ય કારણ વન-ટાઇમ ખર્ચ છે. આ ક્વાર્ટરમાં કંપનીને 106 કરોડ રૂપિયાનું એક્સેપ્શનલ નુકસાન થયું છે, જ્યારે ગયા વર્ષે તે માત્ર 20 કરોડ રૂપિયા હતું. આ નુકસાનની વિગતો પર નજર કરીએ તો, 50 કરોડ રૂપિયાની જોગવાઈ એક કોન્ટ્રાક્ટ સંબંધિત જવાબદારી પૂરી કરવા માટે કરવામાં આવી છે. 30.1 કરોડ રૂપિયાનું નુકસાન એક થર્ડ-પાર્ટી ડેટા સેન્ટરમાં લાગેલી ભયંકર આગની ઘટનાના કારણે ભોગવવું પડ્યું છે.

આવક અને EBITDA માં જોવા મળ્યો ગ્રોથ

જોકે, રોકાણકારો માટે રાહતની વાત એ છે કે નફો ભલે ઘટ્યો હોય પણ કંપનીના મુખ્ય બિઝનેસમાં ગ્રોથ ચાલુ છે. જૂન ક્વાર્ટરમાં કંપનીની ઓપરેશનલ આવક 10.5% વધીને 6,582.8 કરોડ રૂપિયા પર પહોંચી છે, જે એક વર્ષ પહેલા 5,959 કરોડ રૂપિયા હતી. આ ઉપરાંત કંપનીનો EBITDA પણ 8.2% વધીને 1,230.2 કરોડ રૂપિયા નોંધાયો છે. જોકે, માર્જિન પર થોડું દબાણ જોવા મળ્યું છે, કારણ કે EBITDA માર્જિન 19% થી ઘટીને 18.7% પર આવી ગયું છે.

સિંગાપોર સુધીના સબ-સી કેબલ પ્રોજેક્ટમાં મોટું રોકાણ

ભવિષ્યના ગ્રોથ માટે કંપનીએ મોટી તૈયારી કરી લીધી છે. આર્ટિફિશિયલ ઈન્ટેલિજન્સ હબ્સ વચ્ચે કનેક્ટિવિટી વધારવા અને હાઈ-સ્પીડ ડેટાની માંગ પૂરી કરવા કંપની ભારત અને સિંગાપોર વચ્ચે સબ-સી કેબલ નેટવર્ક મજબૂત કરશે. આ માટે કંપનીએ 15.2 કરોડ ડોલરના જંગી રોકાણની જાહેરાત કરી છે.