Zetwerk Manufacturing ના શેરનું નબળું લિસ્ટિંગ, શરૂઆતનો 5%નો ઉછાળો ધોવાયો

Zetwerk Manufacturing IPO Listing: 23 ઓક્ટોબરે ઝેટવર્ક મેન્યુફેક્ચરિંગ બિઝનેસ લિમિટેડનું શેરબજારમાં 5 ટકાના ગેન સાથે લિસ્ટિંગ થયું. જોકે, ત્યારબાદ તરત જ શેરમાં 5 ટકાનો ઘટાડો નોંધાયો અને શરૂઆતનો સમગ્ર લિસ્ટિંગ ગેન ધોવાઈ ગયો. BSE પર શેરનું લિસ્ટિંગ ₹159 અને NSE પર ₹159.25ના ભાવે થયું. IPOની ઇશ્યૂ પ્રાઇસ ₹151 હતી.

કંપનીનો ₹5,012.33 કરોડનો IPO કુલ 3.10 ગણો સબસ્ક્રાઇબ થયો હતો. તેમાં ક્વોલિફાઇડ ઇન્સ્ટિટ્યૂશનલ બાયર્સ (QIB) માટે અનામત હિસ્સો 4.71 ગણો, નોન-ઇન્સ્ટિટ્યૂશનલ ઇન્વેસ્ટર્સ (NII) માટે 1.45 ગણો, રિટેલ રોકાણકારો માટે 0.77 ગણો અને કર્મચારીઓ માટે અનામત હિસ્સો 1.59 ગણો સબસ્ક્રાઇબ થયો હતો.

ઝેટવર્ક અગાઉ એક ડિજિટલ માર્કેટપ્લેસ હતી, જે હવે ઉત્પાદકોને ગ્રાહકો સાથે જોડતા એન્ડ-ટુ-એન્ડ ઔદ્યોગિક મેન્યુફેક્ચરિંગ પ્લેટફોર્મમાં પરિવર્તિત થઈ છે. કંપની વિવિધ ક્ષેત્રોમાં કસ્ટમ-બિલ્ટ કમ્પોનન્ટ્સ માટે એન્જિનિયરિંગ, ઉત્પાદન અને ડિલિવરીની પ્રક્રિયાનું સંચાલન કરે છે. ગ્રાહકો ડિઝાઇન પૂરી પાડે છે, જ્યારે ઝેટવર્ક સપ્લાયરની પસંદગી, ગુણવત્તા નિયંત્રણ, સમયમર્યાદા અને લોજિસ્ટિક્સની જવાબદારી સંભાળે છે. કંપની લેપટોપ, હિયરેબલ્સ, વેરેબલ્સ અને IT હાર્ડવેરનું ઉત્પાદન કરે છે.