Ajit Pawar Death: મહારાષ્ટ્રના 'દાદા'નું નિધન! વિમાન દુર્ઘટનામાં ગુમાવ્યો જીવ, જ્યાંથી રાજકારણ શરૂ કર્યું ત્યાં જ લીધા અંતિમ શ્વાસ

Ajit Pawar Plane Crash Maharashtra Deputy CM: મહારાષ્ટ્રના રાજકારણમાંથી આજે સૌથી મોટા અને દુઃખદ સમાચાર સામે આવ્યા છે. મહારાષ્ટ્રના નાયબ મુખ્યમંત્રી (Deputy CM) અને એનસીપીના કદાવર નેતા અજિત પવાર હવે આપણી વચ્ચે રહ્યા નથી. એક વિમાન દુર્ઘટનામાં તેમનું આકસ્મિક નિધન થયું છે. આ સમાચાર આવતા જ મહારાષ્ટ્ર સહિત દેશભરના રાજકીય વર્તુળોમાં શોકનું મોજું ફરી વળ્યું છે.

બારામતીમાં સર્જાયો ગમખ્વાર અકસ્માત

મળતી માહિતી મુજબ, આ ઘટના અજિત પવારના ગઢ ગણાતા બારામતીમાં જ બની હતી. તેમનું વિમાન બારામતી વિસ્તારમાં દુર્ઘટનાનો શિકાર બન્યું હતું. અકસ્માત બાદ અજિત પવાર ગંભીર રીતે ઘાયલ થયા હતા. તેમને તાત્કાલિક સારવાર માટે સ્થાનિક મેડિકલ કોલેજમાં ખસેડવામાં આવ્યા હતા. ત્યાં ડૉક્ટરોની ટીમે તેમને બચાવવા માટે તમામ પ્રયાસો કર્યા, પરંતુ કમનસીબે તેમનો જીવ બચાવી શકાયો નહીં.

અહેવાલો અનુસાર, આ ભયાનક દુર્ઘટનામાં કુલ 5 લોકોના મોત થયા છે. જેમાં અજિત પવારની સાથે તેમના પીએસઓ (PSO) અને વિમાનના બે ક્રૂ મેમ્બર્સનો પણ સમાવેશ થાય છે.

જ્યાંથી શરૂઆત કરી, ત્યાં જ પૂર્ણ થઈ સફર

કુદરતનો ખેલ જુઓ કે અજિત પવારે જ્યાંથી પોતાની રાજકીય સફર શરૂ કરી હતી, ત્યાં જ તેમણે પોતાના અંતિમ શ્વાસ લીધા. બારામતી તેમનો સૌથી મજબૂત રાજકીય ગઢ હતો. તેઓ અહીંથી સતત 7 વખત ધારાસભ્ય તરીકે ચૂંટાઈ આવ્યા હતા. ઉલ્લેખનીય છે કે, 2025ની વિધાનસભા ચૂંટણીમાં પણ તેમણે આ જ બેઠક પરથી પોતાના ભત્રીજા યુગેન્દ્ર પવારને હરાવીને શાનદાર જીત મેળવી હતી.