India Pakistan tension: ભારત-પાકિસ્તાન વચ્ચે તણાવ ઘટ્યા બાદ અમેરિકાનું મહત્ત્વનું નિવેદન, શાંતિના પ્રયાસોને આવકાર્યા

India Pakistan tension: ભારત અને પાકિસ્તાન વચ્ચે ચાલી રહેલા તણાવમાં નોંધપાત્ર ઘટાડો થયો છે. આ દરમિયાન અમેરિકી વિદેશ વિભાગે બંને દેશોના નેતાઓના શાંતિના પ્રયાસોની પ્રશંસા કરી છે. અમેરિકી વિદેશ વિભાગે એક નિવેદનમાં જણાવ્યું કે, "અમે ભારતના વડાપ્રધાન નરેન્દ્ર મોદી અને પાકિસ્તાનના વડાપ્રધાન શાહબાઝ શરીફની સમજદારી, સંયમ અને શાંતિનો માર્ગ અપનાવવાની રાજનીતિની સરાહના કરીએ છીએ."

સરહદ પર શાંતિનો માહોલ

જમ્મુ-કાશ્મીર અને આંતરરાષ્ટ્રીય સરહદે ગઈ રાત્રે શાંતિનો માહોલ જોવા મળ્યો. ભારતીય સેનાએ જણાવ્યું કે, "જમ્મુ-કાશ્મીર અને આંતરરાષ્ટ્રીય સરહદે આવેલા અન્ય વિસ્તારોમાં ગઈ રાત્રે નોંધપાત્ર શાંતિ રહી. કોઈ અનિચ્છનીય ઘટનાના અહેવાલ નથી. આ તાજેતરના દિવસોમાં પ્રથમ શાંત રાત્રિ હતી." આ શાંતિનો શ્રેય ભારત અને પાકિસ્તાન વચ્ચે થયેલા યુદ્ધવિરામ (સીઝફાયર)ની જાહેરાતને આપવામાં આવી રહ્યો છે.

અમેરિકાનું શાંતિ માટે સમર્થન

અમેરિકી વિદેશ વિભાગે ANI સાથેની વાતચીતમાં વધુમાં જણાવ્યું કે, "રાષ્ટ્રપતિ ડોનાલ્ડ ટ્રમ્પ અને વિદેશ મંત્રી માર્કો રુબિયો બંને દેશોને સંપૂર્ણ યુદ્ધવિરામ જાળવવા અને સીધા સંવાદમાં જોડાવા માટે સતત અપીલ કરી રહ્યા છે. ભવિષ્યમાં સંઘર્ષ ટાળવા માટે રચનાત્મક ચર્ચાઓને સરળ બનાવવામાં અમેરિકા પોતાનું સમર્થન ચાલુ રાખશે."