ભારત-અમેરિકા વેપારમાં મોટી રાહત? 50% ટેરિફનો અંત આવશે, ટ્રમ્પ સરકાર સાથે ડીલ લગભગ નક્કી

India-US trade deal: ભારત અને અમેરિકા વચ્ચે ચાલી રહેલા વેપાર તણાવમાં એક સારા સમાચાર સામે આવ્યા છે. બંને દેશો વચ્ચે પ્રસ્તાવિત વેપાર કરારનો પ્રથમ તબક્કો લગભગ પૂરો થવા આવ્યો છે. એક ઉચ્ચ સરકારી અધિકારીના જણાવ્યા અનુસાર, આ કરારનો મુખ્ય હેતુ અમેરિકી રાષ્ટ્રપતિ ડોનાલ્ડ ટ્રમ્પ દ્વારા ભારતીય ઉત્પાદનો પર લાદવામાં આવેલા 50% ટેરિફનું સમાધાન કરવાનો છે.

શા માટે લાગ્યો હતો 50% ટેરિફ?

ડોનાલ્ડ ટ્રમ્પ પ્રશાસને ભારત પર બે તબક્કામાં કુલ 50% ટેરિફ લગાવ્યો હતો, જેના કારણે ભારતીય નિકાસકારોને ભારે નુકસાન થઈ રહ્યું હતું.

પ્રથમ 25% ટેરિફ: જુલાઈ મહિનાના અંતમાં, ટ્રમ્પે ભારતીય ઉત્પાદનો પર 25% ટેરિફની જાહેરાત કરી હતી, જે 7 ઓગસ્ટથી લાગુ થયો હતો.

વધારાનો 25% ટેરિફ: આ પછી, ભારતે રશિયા પાસેથી ક્રૂડ ઓઇલ ખરીદતા ટ્રમ્પ સરકારે નારાજગી વ્યક્ત કરી હતી અને દંડ તરીકે વધુ 25% ટેરિફ લાદી દીધો હતો. આ વધારાનો ટેરિફ 27 ઓગસ્ટથી અમલમાં આવ્યો હતો.

આમ, હાલમાં ભારતીય નિકાસ પર કુલ 50% જેટલો ભારે ટેરિફ લાગી રહ્યો છે.

ભારતનું મોટું પગલું: અમેરિકા પાસેથી LPGની આયાત