Canada PR Process: વિદેશમાં ભણવા જવું અને ત્યાર બાદ ત્યાં જ નોકરી કરીને કાયમી ધોરણે સ્થાયી થવું (PR મેળવવું), આ સપનું આજે હજારો ભારતીય યુવાનો જોઈ રહ્યા છે. જ્યારે વિદેશ જવાની વાત આવે ત્યારે બે દેશોના નામ સૌથી પહેલા હોઠ પર આવે છે - કેનેડા અને યુનાઇટેડ કિંગડમ (UK). જોકે, હાલના સમયમાં ઇમિગ્રેશનના નિયમો થોડા કડક બન્યા છે, તેમ છતાં તાજેતરના અહેવાલો મુજબ, 'સેટલ' થવાની બાબતમાં કેનેડાએ બ્રિટનને પાછળ રાખી દીધું છે.
Canada vs UK: વિદેશ જવું છે? PR માટે બ્રિટન નહીં પણ કેનેડા છે બેસ્ટ ઓપ્શન! જાણો કેમ ભારતીય વિદ્યાર્થીઓ દોડી રહ્યા છે કેનેડા?
Canada PR Process: શું તમે વિદેશમાં ભણીને ત્યાં જ સેટલ થવા માંગો છો? તો આ સમાચાર તમારા માટે છે. જાણો કેમ PR મેળવવામાં યુકે કરતા કેનેડા ઘણું આગળ છે અને નવા નિયમોમાં શું તફાવત છે.
MoneyControl Newsઅપડેટેડ Jan 07, 2026 પર 10:09 AM
જો તમારો ધ્યેય માત્ર ભણવાનો જ નહીં, પણ ભણ્યા પછી ત્યાંનું નાગરિકત્વ મેળવવાનો હોય, તો કેનેડા હાલમાં સૌથી શ્રેષ્ઠ વિકલ્પ સાબિત થઈ રહ્યો છે. ચાલો સરળ ભાષામાં સમજીએ કે કેમ ભારતીય વિદ્યાર્થીઓ માટે કેનેડા આજે પણ હોટ ફેવરિટ છે.
PR મેળવવું ક્યાં સરળ? કેનેડા કે યુકે?
બંને દેશોમાં અત્યારે વસ્તી અને મકાનોની અછતને કારણે નિયમો કડક બનાવવામાં આવ્યા છે, પણ કેનેડાની સિસ્ટમ વિદ્યાર્થીઓ માટે વધુ સ્પષ્ટ છે.
કેનેડા: અહીં તમારો અભ્યાસ પૂરો થયા પછી માત્ર 1 વર્ષનો કામનો અનુભવ હોય તો પણ તમે કાયમી નિવાસ (PR) માટે અરજી કરી શકો છો.
યુકે: બ્રિટનમાં કાયમી થવા (જેને ત્યાં ILR કહેવાય છે) માટે તમારે ઓછામાં ઓછા 5 વર્ષ અને અમુક કેસમાં તો 10 વર્ષ સુધી રાહ જોવી પડે છે.
વર્ક પરમિટના સમયમાં મોટો ઘટાડો
વિદ્યાર્થીઓ માટે સૌથી મહત્વની બાબત હોય છે ભણ્યા પછી મળતી વર્ક પરમિટ. કેનેડામાં પોસ્ટ-ગ્રેજ્યુએશન વર્ક પરમિટ (PGWP) 3 વર્ષ સુધી મળી શકે છે, જે વિદ્યાર્થીને સેટલ થવા માટે પૂરતો સમય આપે છે. બીજી તરફ યુકેમાં નવા નિયમો મુશ્કેલી વધારી શકે છે. રિપોર્ટ્સ મુજબ, 2026-27થી યુકેમાં વર્ક વિઝાનો સમયગાળો ઘટાડીને માત્ર 18 મહિના કરી દેવામાં આવ્યો છે. એટલે કે નોકરી શોધવા અને સેટલ થવા માટે સમય ઓછો મળશે.
કામના અનુભવની ગણતરીમાં યુકેમાં લોચો!
આ મુદ્દો સમજવો વિદ્યાર્થીઓ માટે સૌથી વધુ જરૂરી છે.
કેનેડા અને યુકે વચ્ચેનો સૌથી મોટો તફાવત 'વર્ક એક્સપિરિયન્સ' ગણવાની પદ્ધતિમાં છે.
કેનેડા: તમે ભણ્યા પછી વર્ક પરમિટ પર જે નોકરી કરો છો, તે અનુભવ સીધો જ તમારા PR મેળવવાના પોઈન્ટ્સમાં ગણાય છે.
યુકે: અહીં સ્થિતિ જુદી છે. સ્ટુડન્ટ વિઝા પછી મળતા 'ગ્રેજ્યુએટ વિઝા' પર તમે જે કામ કરો છો, તે ત્યાંના કાયમી વસવાટ માટે ગણવામાં આવતું નથી. યુકેમાં સેટલ થવા માટે તમારે ફરજિયાત 'સ્કીલ્ડ વર્કર વિઝા' લેવા પડે છે. આ માટે કોઈ કંપની તમને સ્પોન્સર કરે અને તમારો પગાર અમુક નક્કી કરેલા ધોરણ મુજબ હોય તો જ મેળ પડે છે, જે પ્રક્રિયા ઘણી અઘરી છે.
ઝડપી સેટલમેન્ટ: 3 વર્ષ vs 10 વર્ષ
સરળ ગણિત માંડીએ તો, જો કોઈ વિદ્યાર્થી 22 વર્ષની ઉંમરે કેનેડા ભણવા જાય, તો તે 25 વર્ષનો થાય ત્યાં સુધીમાં એટલે કે માત્ર 3 વર્ષમાં PR મેળવી શકે છે. જ્યારે યુકેમાં આ જ સ્ટેજ પર પહોંચતા તેને 7 થી 10 વર્ષ લાગી શકે છે. એટલે કે યુવાનીના મહત્વના વર્ષો માત્ર વિઝાના ટેન્શનમાં જ વીતી શકે છે.
જો તમે લાંબા ગાળાના આયોજન સાથે વિદેશ જવા માંગતા હોવ અને તમારો મુખ્ય હેતુ ત્યાં કાયમી સ્થાયી થવાનો હોય, તો હાલના સંજોગો અને નિયમો જોતા કેનેડા એ યુકે કરતા વધુ સુરક્ષિત, ઝડપી અને સરળ રસ્તો છે. યુકેમાં ભણતર સારું છે, પણ સેટલ થવાનો રસ્તો હવે સાંકડો થઈ રહ્યો છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.