ગુજરાતમાં કોરોનાનું સંકટ: અમદાવાદમાં 18 વર્ષીય સગર્ભાનું મોત, એક્ટિવ કેસ 397

Gujarat COVID-19 Cases: ગુજરાતમાં કોરોના વાયરસના કેસ ફરી એકવાર ચિંતાનો વિષય બન્યા છે. રાજ્યમાં એક્ટિવ કેસની સંખ્યા વધીને 397 થઈ છે, જેમાંથી અમદાવાદમાં જ 197 કેસ નોંધાયા છે. આ વચ્ચે અમદાવાદની એલ.જી. હોસ્પિટલમાં 18 વર્ષીય સગર્ભા મહિલાનું કોરોનાને કારણે મોત થયું છે, જે શહેરમાં આંચકો લાવનારી ઘટના છે. આ પહેલા પણ એલ.જી. હોસ્પિટલમાં 46 વર્ષીય મહિલાનું કોવિડથી મોત થયું હતું.

અમદાવાદમાં એક જ દિવસમાં 50 નવા કેસ

મળતી માહિતી પ્રમાણે, ગઈકાલે અમદાવાદમાં એક જ દિવસમાં 50 નવા કોરોના કેસ નોંધાયા છે. આ સાથે શહેરની અસારવા સિવિલ હોસ્પિટલમાં વધુ એક કોવિડ દર્દી દાખલ થતાં હાલ ત્રણ દર્દી સારવાર હેઠળ છે. ખાસ ચિંતાની વાત એ છે કે, આ હોસ્પિટલમાં એક આઠ માસની બાળકી ઓક્સિજન સપોર્ટ પર સારવાર લઈ રહી છે, જે રાજ્યની હેલ્થ સિસ્ટમ પર પડી રહેલા દબાણનો સંકેત આપે છે.

ગુજરાત દેશમાં ચોથા સ્થાને

એક્ટિવ કેસની દૃષ્ટિએ ગુજરાત હાલ દેશમાં ચોથા ક્રમે છે. અમદાવાદમાં કેસની સંખ્યા સતત વધી રહી હોવાથી હેલ્થ ડિપાર્ટમેન્ટે લોકોને માસ્ક પહેરવા, સોશિયલ ડિસ્ટન્સિંગ જાળવવા અને વેક્સિનેશન પર ધ્યાન આપવા અપીલ કરી છે.

શું છે ચિંતાનું કારણ?

કોરોનાના નવા વેરિઅન્ટ અને ઠંડીની સિઝનને કારણે કેસમાં વધારો થઈ રહ્યો હોવાનું નિષ્ણાતોનું માનવું છે. અમદાવાદ જેવા શહેરી વિસ્તારોમાં ટેસ્ટિંગ અને ટ્રેસિંગની પ્રક્રિયા તેજ કરવામાં આવી છે. સરકારે હોસ્પિટલોમાં ઓક્સિજન બેડ, વેન્ટિલેટર અને ICUની સુવિધાઓને અપગ્રેડ કરવાના આદેશ આપ્યા છે.