Dharmendra Death: બોલીવુડના ‘હીમેન’ ધર્મેન્દ્રનું 89 વર્ષની વયે નિધન, હિન્દી સિનેમાએ એક યુગ ગુમાવ્યો

Dharmendra Death: હિન્દી સિનેમાના પીઢ અભિનેતા અને ચાહકોના પ્રિય ‘હીમેન’ ધર્મેન્દ્રએ 89 વર્ષની વયે દુનિયાને અલવિદા કહ્યું છે. લાંબા સમયથી બીમારી સામે ઝઝૂમી રહેલા અભિનેતાએ આજે બપોરે 1 વાગ્યે મુંબઈની બ્રીચ કેન્ડી હોસ્પિટલમાં અંતિમ શ્વાસ લીધા હતા. તેમના નિધનથી સમગ્ર બોલીવુડ અને ચાહકોમાં શોકની લહેર છે.

અંતિમ ક્ષણો અને બોલીવુડની હાજરી ગઈકાલે રાત્રે શ્વાસ લેવામાં તકલીફ થતાં ધર્મેન્દ્રને તાત્કાલિક વેન્ટિલેટર પર ખસેડવામાં આવ્યા હતા. અનેક પ્રયાસો છતાં ડોકટરો તેમને બચાવી શક્યા નહીં. આ દુઃખદ સમયે સમગ્ર દેઓલ પરિવાર હોસ્પિટલમાં હાજર રહ્યો હતો. સલમાન ખાનથી લઈને શાહરૂખ ખાન સુધીના સુપરસ્ટાર્સે હોસ્પિટલ પહોંચીને અભિનેતાની મુલાકાત લીધી હતી.

વિલે પાર્લેમાં અંતિમ સંસ્કાર ધર્મેન્દ્રના પાર્થિવ દેહના અંતિમ સંસ્કાર મુંબઈના વિલે પાર્લે સ્મશાનગૃહમાં કરવામાં આવી રહ્યા છે. અમિતાભ બચ્ચન અને અભિષેક બચ્ચન સહિત બોલીવુડની અનેક મોટી હસ્તીઓ અને દેઓલ પરિવાર ત્યાં હાજર છે. જોકે, પરિવાર તરફથી હજુ સુધી કોઈ સત્તાવાર નિવેદન જાહેર કરવામાં આવ્યું નથી.

એક ચાહકથી સુપરસ્ટાર સુધીની સફર 8 December 1935 ના રોજ પંજાબમાં જન્મેલા ધરમ સિંહ દેઓલ (ધર્મેન્દ્ર)ના પિતા શાળાના મુખ્ય શિક્ષક હતા. બાળપણમાં સુરૈયાની ફિલ્મ "દિલ્લગી" જોઈને તેમને અભિનયનો એવો શોખ જાગ્યો કે તેમણે આ ફિલ્મ જોવા માટે માઈલો સુધી ચાલીને જઈને સતત 40 દિવસ સુધી તે ફિલ્મ જોઈ હતી.