ગુજરાત પર ડબલ આફત: અરબ સાગરનું ડિપ્રેશન સૌરાષ્ટ્ર તરફ, 480 કિમી દૂર, અમરેલી-ભાવનગરમાં ઓરેન્જ એલર્ટ

Weather Forecast Gujarat: ગુજરાત પર ફરી એકવાર પ્રકૃતિનો પ્રકોપ ખેંચાઈ આવ્યો છે. એક તરફ આંધ્રપ્રદેશના કાંઠે 110 કિલોમીટર પ્રતિ કલાકની ઝડપે ત્રાટકતું સિવિયર સાયક્લોનિક સ્ટોર્મ ‘મોનથા’ વિનાશ વેરી રહ્યું છે, તો બીજી તરફ પૂર્વ-મધ્ય અરબ સાગરમાંથી ઉદ્ભવેલું ડિપ્રેશન ઝડપભેર ગુજરાત તરફ આગળ વધી રહ્યું છે. આ સિસ્ટમે ખેડૂતોની ચિંતા વધારી દીધી છે, કારણ કે કમોસમી માવઠાએ પહેલેથી જ પાકને ભારે નુકસાન પહોંચાડ્યું છે.

સૌરાષ્ટ્ર પર તોળાતો ખતરો

સોમવારે આ ડિપ્રેશન વેરાવળથી 570 કિલોમીટર દૂર હતું, પરંતુ મંગળવાર સાંજ સુધીમાં તે માત્ર 480 કિલોમીટરના અંતરે પહોંચી ગયું – એટલે કે 24 કલાકમાં 90 કિલોમીટરથી વધુ નજીક આવી ગયું. હવામાન વિભાગના જણાવ્યા મુજબ, આ સિસ્ટમ ઉત્તર-પૂર્વ દિશામાં – એટલે કે સૌરાષ્ટ્ર તરફ – 7 કિલોમીટર પ્રતિ કલાકની ઝડપે આગળ વધી રહી છે અને આ જ દિશામાં વધવાની શક્યતા છે.

રાજસ્થાન ઉપર સાયક્લોનિક સર્ક્યુલેશન સક્રિય

આ ડિપ્રેશનની અસર વધારવા માટે રાજસ્થાન ઉપર સાયક્લોનિક સર્ક્યુલેશન સક્રિય થયું છે. આના કારણે મધ્ય ગુજરાતથી રાજસ્થાન સુધી સમુદ્ર સપાટીથી 1.5 કિલોમીટર ઉંચાઈએ એક ટ્રફ રચાયો છે, જે ભારે વરસાદનું કારણ બનશે. સાથે જ વેસ્ટર્ન ડિસ્ટર્બન્સ પણ સક્રિય છે, જેના પરિણામે ગુજરાતમાં માવઠાની સ્થિતિ હજુ ઘણા દિવસો સુધી ચાલુ રહેવાની આશંકા છે.

29 ઓક્ટોબર માટે ગંભીર ચેતવણી

હવામાન વિભાગે બુધવાર, 29 ઓક્ટોબર માટે ગંભીર ચેતવણી જાહેર કરી છે. અમરેલી અને ભાવનગર જિલ્લામાં ઓરેન્જ એલર્ટ જાહેર કરવામાં આવી છે, એટલે કે અતિ ભારે વરસાદની શક્યતા છે. દક્ષિણ ગુજરાતના ભરુચ, સુરત, ડાંગ, નવસારી, વલસાડ, તાપી તેમજ જૂનાગઢ, સોમનાથ, બોટાદ અને દીવ-દમણમાં ભારે વરસાદની આગાહી છે. રાજ્યના અન્ય જિલ્લાઓમાં 30થી 40 કિલોમીટર પ્રતિ કલાકની ઝડપે પવન સાથે તોફાની વરસાદ પડી શકે છે.