ક્રિપ્ટો માર્કેટમાં ભૂકંપ: ડોનાલ્ડ ટ્રમ્પની સંપત્તિમાં 9,165 કરોડનું જંગી ગાબડું, TMTGના શેર તળિયે

Cryptocurrency and Trump : આર્થિક મોરચે અમેરિકાના પ્રમુખ ડોનાલ્ડ ટ્રમ્પને મોટો ફટકો પડ્યો છે. ફોર્બ્સના એક તાજેતરના રિપોર્ટ અનુસાર, ક્રિપ્ટોકરન્સી માર્કેટમાં આવેલા ભૂકંપ અને ખાસ કરીને વિશ્વની સૌથી મોટી ક્રિપ્ટોકરન્સી બિટકોઈનના ભાવમાં થયેલા નોંધપાત્ર ઘટાડાને કારણે તેમની કુલ સંપત્તિ (નેટવર્થ)માં 1.1 અબજ ડોલર, એટલે કે આશરે 9,165 કરોડ રૂપિયાનો જંગી ઘટાડો નોંધાયો છે.

ફોર્બ્સના નવા રિપોર્ટ મુજબ, ડોનાલ્ડ ટ્રમ્પની કુલ સંપત્તિ ઘટીને 6.2 અબજ ડોલર થઈ ગઈ છે, જ્યારે સપ્ટેમ્બર મહિનામાં તે 7.3 અબજ ડોલર હતી. આ મોટા ઘટાડા પાછળનું મુખ્ય કારણ તેમની ટેકનોલોજી કંપની 'ટ્રમ્પ મીડિયા એન્ડ ટેકનોલોજી ગ્રુપ' (TMTG)ના શેરમાં આવેલો ભારે કડાકો છે, જે DJT ટિકર હેઠળ વેપાર કરે છે. ગત શુક્રવારે બિટકોઈન સહિત અન્ય ક્રિપ્ટોકરન્સીમાં થયેલા ભારે વેચાણના દબાણ હેઠળ TMTGનો શેર 10.18 ડોલર સુધી ગગડી ગયો હતો, જે તેનું અત્યાર સુધીનું સૌથી નીચલું સ્તર છે. છેલ્લા 1 મહિનામાં આ શેરમાં 35 ટકાનો અને છેલ્લા 6 મહિનામાં 55 ટકાનો જંગી ઘટાડો જોવા મળ્યો છે.

નોંધનીય છે કે સપ્ટેમ્બર 2025 સુધી ડોનાલ્ડ ટ્રમ્પની સંપત્તિમાં જોરદાર વધારો જોવા મળ્યો હતો. ગત વર્ષની સરખામણીમાં તેમની નેટવર્થમાં 3 અબજ ડોલરનો ઉછાળો આવ્યો હતો અને આ વધારા સાથે તેઓ ફોર્બ્સની અમેરિકાના 400 સૌથી અમીર લોકોની યાદીમાં 201મા સ્થાને પહોંચી ગયા હતા. પરંતુ હવે અચાનક તેમની સંપત્તિમાં મોટો ઘટાડો થયો છે.

રિપોર્ટ અનુસાર, ટ્રમ્પની સંપત્તિમાં થયેલો વધારો મુખ્યત્વે તેમના પરિવારના ક્રિપ્ટો રોકાણોને કારણે હતો, જેમાં ગયા વર્ષે જાહેર થયેલ બિઝનેસ 'વર્લ્ડ લિબર્ટી ફાઇનાન્સિયલ' પણ સામેલ છે. આ ફર્મને ક્રિપ્ટો ઉદ્યોગપતિ જસ્ટિન સન પાસેથી 75 મિલિયન ડોલરનું નોંધપાત્ર રોકાણ પણ મળ્યું હતું. આ કંપનીએ 100 અબજ $WLFI ટોકન બનાવ્યા હતા, જેમાંથી 22.5 અબજ ટોકન એક એવી LLCને આપવામાં આવ્યા હતા જેમાં ટ્રમ્પની લગભગ 70 ટકા હિસ્સેદારી છે. લોન્ચ સમયે આ ટોકનની કિંમત 0.31 ડોલર હતી, જે હવે ઘટીને માત્ર 0.158 ડોલર રહી ગઈ છે, જેના કારણે ટ્રમ્પના રોકાણોમાં મોટું ધોવાણ થયું છે.

જો વિશ્વની સૌથી મોટી ક્રિપ્ટોકરન્સી બિટકોઈનની વાત કરીએ તો 6 ઓક્ટોબરે તેની કિંમત લગભગ 1,25,000 ડોલરની ટોચે પહોંચી ગઈ હતી. પરંતુ ત્યારથી તેમાં 30 ટકાથી વધુનો ઘટાડો થયો છે અને હાલમાં તે 86,174 ડોલર પર ટ્રેડ કરી રહી છે. માત્ર છેલ્લા 1 મહિનામાં જ બિટકોઈનના ભાવમાં લગભગ 22 ટકાનો ઘટાડો જોવા મળ્યો છે, જેની સીધી અને નકારાત્મક અસર ડોનાલ્ડ ટ્રમ્પના ક્રિપ્ટો રોકાણો અને તેમની કુલ સંપત્તિ પર પડી છે.

આ પણ વાંચો- ગુજરાતમાં મતદાર સુધારણા કાર્યક્રમ: BLO પર ડિજિટાઈઝેશનનો બોજ, 4 જીવ ગયા અને તણાવ વધ્યો