વિદેશ મંત્રી એસ. જયશંકરનું મોટું નિવેદન: અમેરિકા દુનિયા સાથેના સંબંધોની શરતો બદલી રહ્યું છે, ભારતે પકડ્યો આત્મનિર્ભરતાનો માર્ગ

India-US relations: ભારતના વિદેશ મંત્રી એસ. જયશંકરે અમેરિકાની વિદેશ નીતિને લઈને એક ખૂબ જ મહત્વપૂર્ણ ટિપ્પણી કરી છે. તેમણે જણાવ્યું કે અમેરિકા હવે દેશો સાથે સીધા વન-ઓન-વન એટલે કે દ્વિપક્ષીય સંબંધો બનાવીને વૈશ્વિક સ્તરે જોડાણની શરતોને મૂળભૂત રીતે બદલી રહ્યું છે. આ નિવેદન તેમણે ઇન્ડિયન ઇન્સ્ટિટ્યૂટ ઓફ મેનેજમેન્ટ (IIM), કોલકાતામાં ડોક્ટરેટની માનદ પદવી મેળવ્યા બાદ આપ્યું હતું.

અમેરિકાની નવી રણનીતિ અને ભારત પર અસર

વિદેશ મંત્રીનું આ નિવેદન એવા સમયે આવ્યું છે જ્યારે લગભગ 3 મહિના પહેલા અમેરિકી રાષ્ટ્રપતિ ડોનાલ્ડ ટ્રમ્પ દ્વારા ભારત પર 50% સુધીનો ટેરિફ લગાવવામાં આવ્યો હતો. જયશંકરે સ્પષ્ટ કર્યું કે અમેરિકાની આ વન-ઓન-વન પોલિસીએ બહુપક્ષીય એટલે કે મલ્ટિલેટરલ વૈશ્વિક વ્યવસ્થા સામે એક મોટો પડકાર ઉભો કર્યો છે. આ નીતિને કારણે ઘણા દેશો માટે આંતરરાષ્ટ્રીય સંબંધોની શરતો બદલાઈ ગઈ છે. ઉલ્લેખનીય છે કે હાલમાં ભારત અને અમેરિકા વચ્ચે એક મોટા વેપાર કરારને લઈને વાતચીત ચાલી રહી છે, જેનું પરિણામ ભવિષ્યમાં જોવા મળશે.

આત્મનિર્ભરતા અને મેક ઇન ઇન્ડિયા પર ભારતનો ભાર

એસ. જયશંકરે ભારપૂર્વક જણાવ્યું કે આવા વૈશ્વિક બદલાવ વચ્ચે ભારત હવે ઝડપથી આત્મનિર્ભરતા તરફ આગળ વધી રહ્યું છે. સાથે જ, ભારત પોતાને ઉદ્યોગો માટે એક મોટા મેન્યુફેક્ચરિંગ હબ તરીકે સ્થાપિત કરી રહ્યું છે.

તેમણે ચીનનો ઉલ્લેખ કરતાં કહ્યું કે, "આજે વિશ્વના કુલ ઉત્પાદનનો ત્રીજો ભાગ ચીનમાં થાય છે, જેના કારણે સપ્લાય ચેઇનની વિશ્વસનીયતા પર સવાલો ઉભા થયા છે." તેમણે ઉમેર્યું, "આજે દુનિયા ભારત દ્વારા કરવામાં આવી રહેલી પ્રગતિ પર ધ્યાન આપી રહી છે અને અમે દરેક માપદંડ પર ઝડપથી આગળ વધી રહ્યા છીએ." આ જ વિચારધારા સાથે ભારત આજે નવા વેપાર કરારો અને કનેક્ટિવિટી પ્રોજેક્ટ્સને પ્રોત્સાહન આપી રહ્યું છે.

સક્રિય કૂટનીતિ એ જ ભારતનો નવો મંત્ર