ફિલ્મફેર એવોર્ડ્સ 2025: અભિષેક બચ્ચનને 25 વર્ષ બાદ બેસ્ટ એક્ટર, 'લાપતા લેડીઝ'નો ડંકો

Filmfare Awards 2025: ગુજરાતની ધરતી પર 11 ઓક્ટોબર, 2025ની સાંજે 70મા ફિલ્મફેર એવોર્ડ્સનું ભવ્ય આયોજન થયું. આ ગ્લેમરસ ઇવેન્ટમાં શાહરૂખ ખાન, અક્ષય કુમાર, કરણ જોહર અને કાર્તિક આર્યન જેવા બોલિવૂડના મોટા સ્ટાર્સે અમદાવાદની રાતને યાદગાર બનાવી. 2024ની શ્રેષ્ઠ ફિલ્મો અને કલાકારોને સન્માનિત કરવા માટે આયોજિત આ સમારોહમાં આમિર ખાનના પ્રોડક્શન હાઉસની ફિલ્મ 'લાપતા લેડીઝ'એ બાજી મારી, જ્યારે અભિષેક બચ્ચને 25 વર્ષની કરિયર બાદ પોતાનો પહેલો બેસ્ટ એક્ટર એવોર્ડ જીત્યો.

‘લાપતા લેડીઝ'નો દબદબો

આમિર ખાનના પ્રોડક્શન હાઉસ દ્વારા બનાવવામાં આવેલી અને કિરણ રાવ દ્વારા ડિરેક્ટેડ ફિલ્મ ‘લાપતા લેડીઝ'એ આ વર્ષના ફિલ્મફેર એવોર્ડ્સમાં 13 એવોર્ડ્સ જીતીને ઈતિહાસ રચ્યો. આ ફિલ્મે બેસ્ટ ફિલ્મ, બેસ્ટ ડિરેક્ટર (કિરણ રાવ), બેસ્ટ સ્ક્રીનપ્લે, બેસ્ટ ડાયલોગ (સ્નેહા દેસાઈ), બેસ્ટ મ્યુઝિક આલ્બમ (રામ સંપત) અને બેસ્ટ પ્લેબેક સિંગર (અરિજીત સિંહ) જેવી મહત્ત્વની કેટેગરીઓમાં એવોર્ડ્સ પોતાના નામે કર્યા. આ ઉપરાંત, ફિલ્મની અભિનેત્રી નિતાંશી ગોયલે બેસ્ટ ડેબ્યૂ (ફીમેલ) અને પ્રતિભા રાંટાએ બેસ્ટ એક્ટ્રેસ (ક્રિટીક્સ)નો એવોર્ડ જીત્યો.

અભિષેક બચ્ચનની ઐતિહાસિક જીત

અભિષેક બચ્ચને બોલિવૂડમાં 25 વર્ષની લાંબી સફર બાદ શૂજિત સરકારની ફિલ્મ 'આઇ વોન્ટ ટુ ટૉક' માટે બેસ્ટ એક્ટરનો ફિલ્મફેર એવોર્ડ જીત્યો. આ તેમનો પહેલો બેસ્ટ એક્ટર એવોર્ડ છે, જોકે તેઓ અગાઉ બેસ્ટ સપોર્ટિંગ એક્ટરનો એવોર્ડ જીતી ચૂક્યા છે. આ ફિલ્મે બેસ્ટ ફિલ્મ (ક્રિટીક્સ) અને બેસ્ટ એડપ્ટેડ સ્ક્રીનપ્લે (રિતેશ શાહ, તુષાર શીતલ જૈન)ના એવોર્ડ્સ પણ જીત્યા.

કાર્તિક આર્યન અને આલિયા ભટ્ટની શાનદાર સફળતા

કાર્તિક આર્યનને ફિલ્મ 'ચંદુ ચેમ્પિયન' માટે બેસ્ટ એક્ટરનો એવોર્ડ મળ્યો, જે તેમનો પહેલો બેસ્ટ એક્ટર ફિલ્મફેર એવોર્ડ છે. આ ઉપરાંત, આલિયા ભટ્ટે 'જીગરા' માટે બેસ્ટ એક્ટ્રેસનો એવોર્ડ જીત્યો. આ બંને સ્ટાર્સે પોતાની શાનદાર એક્ટિંગથી દર્શકો અને ક્રિટીક્સનું દિલ જીતી લીધું.