દક્ષિણ આફ્રિકામાં પહેલું G-20: PM મોદીની હાજરીથી ભારત રચશે નવો રાજદ્વારી અધ્યાય

South Africa G-20: વડાપ્રધાન નરેન્દ્ર મોદી 21 નવેમ્બરથી દક્ષિણ આફ્રિકાના જોહાનિસબર્ગમાં યોજાનાર G-20 શિખર સંમેલનમાં ભાગ લેવા માટે રવાના થઇ રહ્યાં છે. દક્ષિણ આફ્રિકા G-20નું સભ્ય બન્યા પછી પહેલીવાર આ સમિટનું આયોજન કરી રહ્યું છે, ત્યારે PM મોદીની હાજરી "ગ્લોબલ સાઉથ" (વૈશ્વિક દક્ષિણ) માટે નવો રાજદ્વારી ઇતિહાસ લખશે. નોંધનીય છે કે, નવેમ્બર 2023માં નવી દિલ્હીમાં યોજાયેલા G-20 શિખર સંમેલન દરમિયાન, ભારતે ગ્લોબલ સાઉથની મજબૂત વકાલત કરતા દક્ષિણ આફ્રિકાને આ શિખર સંમેલનનું સભ્ય બનાવવામાં મહત્વપૂર્ણ ભૂમિકા ભજવી હતી.

વડાપ્રધાનના કાર્યક્રમની વિગતો

વિદેશ મંત્રાલયે એક પ્રેસ કોન્ફરન્સ દ્વારા વડાપ્રધાન મોદીની જોહાનિસબર્ગ યાત્રાની વિગતો શેર કરી છે. વિદેશ સચિવ (પૂર્વ અને દક્ષિણ આફ્રિકા) સુધાકર દલેલાએ જણાવ્યું કે, વડાપ્રધાન નરેન્દ્ર મોદી 21થી 23 નવેમ્બર 2025 સુધી જોહાનિસબર્ગની યાત્રા પર રહેશે. તેઓ દક્ષિણ આફ્રિકાના રાષ્ટ્રપતિના આમંત્રણ પર G-20 શિખર સંમેલનમાં ભાગ લેશે. આ વડાપ્રધાનની દક્ષિણ આફ્રિકાની ચોથી યાત્રા હશે.

આફ્રિકન ભૂમિ પર પ્રથમ G-20 સંમેલન

વિદેશ સચિવે વધુમાં જણાવ્યું કે, આ પહેલો પ્રસંગ છે જ્યારે G-20 શિખર સંમેલન આફ્રિકન ખંડની ધરતી પર યોજાઈ રહ્યું છે. આ કારણે, આ વખતે સમગ્ર વિશ્વની નજર આફ્રિકાના વિકાસના મુદ્દાઓ અને "ગ્લોબલ સાઉથ"ની ચિંતાઓ પર રહેશે. તેમણે યાદ અપાવ્યું કે, 2023માં ભારતની G-20 અધ્યક્ષતા દરમિયાન જ આફ્રિકન યુનિયનને G-20નું કાયમી સભ્ય બનાવવામાં આવ્યું હતું, જે ભારતની કૂટનીતિક સફળતાનું એક મોટું ઉદાહરણ હતું.

ભારત માટે શા માટે મહત્વપૂર્ણ છે આ સંમેલન?

દલેલાએ કહ્યું કે, 2023માં ભારતે અત્યંત સફળ G-20 અધ્યક્ષતા કરી હતી. હવે દક્ષિણ આફ્રિકાની અધ્યક્ષતામાં યોજાઈ રહેલા આ સંમેલનમાં ભારત એ સુનિશ્ચિત કરવા માંગે છે કે, અમારા દ્વારા શરૂ કરાયેલી પ્રાથમિકતાઓ અને પહેલ આગળ પણ ચાલુ રહે. G-20 આજે આંતરરાષ્ટ્રીય આર્થિક સહયોગનું સૌથી મુખ્ય મંચ બની ચૂક્યું છે, અને વૈશ્વિક મહત્વના તમામ મુદ્દાઓ પર ચર્ચા માટેનું સૌથી પ્રભાવશાળી પ્લેટફોર્મ પણ છે.