Gujarat Toll Tax Collection: ગુજરાતના વાહનચાલકો માટે એક ચોંકાવનારા સમાચાર સામે આવ્યા છે. એક તરફ રાજ્યના અનેક હાઈવે પર રસ્તાઓની હાલત 'ખખડધજ' છે, ખાડાઓનું સામ્રાજ્ય છે, છતાં બીજી તરફ વાહનચાલકોએ ટોલ ટેક્સ ચૂકવવામાં કોઈ કચાશ રાખી નથી. છેલ્લા 3 વર્ષના આંકડાઓ પર નજર કરીએ તો, ગુજરાતમાં વાહનચાલકોએ ફાસ્ટેગ (FASTag) મારફતે 16,000 કરોડ રૂપિયાથી પણ વધુની રકમ ટોલ ટેક્સ પેટે ચૂકવી દીધી છે.
Gujarat Toll Tax Collection: ખખડધજ રસ્તા છતાં ગુજરાતની પ્રજાએ ચૂકવ્યો 16000 કરોડનો ટોલ ટેક્સ! જાણો 3 વર્ષનો ચોંકાવનારો હિસાબ
Gujarat Toll Tax Collection: ગુજરાતમાં તૂટેલા રસ્તાઓ વચ્ચે વાહનચાલકોના ખિસ્સા ખાલી! છેલ્લા 3 વર્ષમાં ફાસ્ટેગ દ્વારા 16000 કરોડથી વધુનો ટોલ ટેક્સ ચૂકવાયો. જાણો કયા વર્ષમાં કેટલી આવક થઈ અને હાઈવેની હાલત શું છે તે અંગેનો વિગતવાર અહેવાલ.
MoneyControl Newsઅપડેટેડ Jan 30, 2026 પર 11:59 AM
ટોલ ટેક્સની આવકમાં સતત વધારો
ગુજરાતમાં ડિજિટલ પેમેન્ટ અને ફાસ્ટેગના વધતા ઉપયોગને કારણે ટોલની આવકમાં તોતિંગ ઉછાળો જોવા મળ્યો છે. છેલ્લા ત્રણ વર્ષના આંકડા જોઈએ તો ખ્યાલ આવે છે કે વાહનચાલકોના ખિસ્સા પર કેટલો ભાર વધ્યો છે:
* વર્ષ 2023: 4794 કરોડ રૂપિયા
* વર્ષ 2024: 4919 કરોડ રૂપિયા
* વર્ષ 2025: 6418 કરોડ રૂપિયા
આમ, વર્ષ 2025માં ટોલ કલેક્શનનો આંકડો રેકોર્ડ બ્રેક સપાટીએ પહોંચી ગયો છે.
રોજની આવકમાં પણ ધરખમ વધારો
જો આપણે દૈનિક ધોરણે વાત કરીએ તો, ગુજરાતના હાઈવે પરથી પસાર થતા વાહનો હવે રોજના કરોડો રૂપિયા ચૂકવે છે. વર્ષ 2023માં પ્રતિ દિવસ સરેરાશ 13.14 કરોડ રૂપિયાનો ટેક્સ વસૂલવામાં આવતો હતો, જે 2024માં વધીને 13.44 કરોડ થયો. જ્યારે વર્ષ 2025માં તો આ આંકડો સીધો 17.58 કરોડ રૂપિયા પ્રતિ દિવસ પર પહોંચી ગયો છે. સરળ ભાષામાં કહીએ તો, વર્ષ 2023ની સરખામણીમાં વર્ષ 2025માં પ્રતિ દિવસના સરેરાશ ટોલ ટેક્સમાં સીધો 34 ટકાનો વધારો નોંધાયો છે.
કાર ચાલકોએ કેટલા ચૂકવ્યા?
માત્ર મોટા કોમર્શિયલ વાહનો જ નહીં, પરંતુ સામાન્ય કાર, જીપ અને વાન ચાલકોએ પણ મોટી રકમ ચૂકવી છે.
* 2023માં કાર ચાલકોએ 724 કરોડ રૂપિયા ચૂકવ્યા હતા.
* 2024માં આ રકમ 744 કરોડ રૂપિયા હતી.
* 2025માં કાર અને જીપ ચાલકો દ્વારા 924 કરોડ રૂપિયાનો ટોલ ટેક્સ ચૂકવવામાં આવ્યો છે.
શા માટે વધ્યો ટોલ ટેક્સ?
જાણકારોના મતે, વર્ષ 2024 સુધી ટોલની આવકમાં વૃદ્ધિ સામાન્ય હતી, પરંતુ 2025માં તેમાં મોટો ઉછાળો આવ્યો છે. આ પાછળના મુખ્ય કારણોમાં ફાસ્ટેગના ઉપયોગમાં વધારો, હાઈવે પર ટ્રાફિકનું વધતું પ્રમાણ અને આર્થિક પ્રવૃત્તિઓમાં આવેલી તેજી જવાબદાર છે. લોકો હવે ડિજિટલ ટોલ સિસ્ટમથી ટેવાઈ ગયા છે, જેના કારણે ફાસ્ટેગના વ્યવહારોમાં 2025માં 30 ટકાથી વધુનો ઉછાળો જોવા મળ્યો છે.
પેટ્રોલ-ડીઝલના ટેક્સમાં પણ જબ્બર આવક
વાહનચાલકો માત્ર ટોલ ટેક્સ જ નથી ચૂકવતા, પરંતુ ઈંધણ પુરાવતી વખતે પણ સરકારને ટેક્સ આપે છે. રિપોર્ટ મુજબ, પેટ્રોલિયમ પ્રોડક્ટ્સ પરના સેલ્સ ટેક્સ અને વેટ (VAT) પેટે ગુજરાત સરકારને વર્ષ 2024-25માં 24,586 કરોડ રૂપિયાની આવક થઈ છે. વર્ષ 2020-21ની સરખામણીએ આ આવકમાં પણ 30 ટકાથી વધુનો વધારો થયો છે.
આ સમગ્ર અહેવાલ પરથી એક વાત સ્પષ્ટ થાય છે કે, ગુજરાતના નાગરિકો સરકારની તિજોરી ભરવામાં કોઈ કમી રાખતા નથી. ટોલ ટેક્સ હોય કે પેટ્રોલ ટેક્સ, આવક સતત વધી રહી છે. પરંતુ સવાલ એ છે કે, 16,000 કરોડ જેવી માતબર રકમ ટોલ પેટે ચૂકવ્યા પછી પણ લોકોને સારા રસ્તા કેમ નથી મળતા? આવક સામે સુવિધાના નામે રસ્તાઓ હજુ પણ ખખડધજ હાલતમાં જોવા મળી રહ્યા છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.