નવરાત્રીમાં ખેલૈયાઓ સાચવજો: નવમા નોરતે ગુજરાતના 4 જિલ્લામાં વરસાદની આગાહી, ડીસા-ભુજમાં ગરમી 40 ડિગ્રીને પાર

Navratri rain forecast: ગુજરાતમાંથી હવે નૈઋત્યનું ચોમાસું ધીમે ધીમે વિદાય લઈ રહ્યું છે. પરંતુ વાતાવરણમાં હજુ પણ પલટા જોવા મળી રહ્યા છે. એક તરફ નવરાત્રીનો માહોલ બરાબરનો જામ્યો છે, ત્યારે હવામાન વિભાગે અમુક જિલ્લાના ખેલૈયાઓનું ટેન્શન વધારે તેવા સમાચાર આપ્યા છે. રાજ્યમાં હાલ દિવસે આકરો તાપ અને રાત્રે સામાન્ય ઠંડક એમ મિશ્ર ઋતુનો અનુભવ થઈ રહ્યો છે.

આ 4 જિલ્લાઓમાં વરસાદની આગાહી

હવામાન વિભાગની લેટેસ્ટ આગાહી અનુસાર, ચાલુ સપ્તાહના અંતે એટલે કે 19 તારીખની આસપાસ નવમા નોરતે રાજ્યના અમુક વિસ્તારોમાં વાતાવરણમાં પલટો આવી શકે છે.

સૌરાષ્ટ્ર: અમરેલી અને ભાવનગર જિલ્લામાં છૂટાછવાયા સ્થળોએ વરસાદ પડી શકે છે.

દક્ષિણ ગુજરાત: નવસારી, વલસાડ તેમજ દમણ અને દાદરા નગર હવેલીમાં ગાજવીજ સાથે હળવાથી મધ્યમ વરસાદ પડવાની સંભાવના વ્યક્ત કરવામાં આવી છે.

તાપમાનમાં 13થી 14 ડિગ્રીનો મોટો તફાવત

હાલ સમગ્ર ગુજરાતમાં સૂકું હવામાન જોવા મળી રહ્યું છે. પરંતુ મહત્તમ અને ન્યૂનતમ તાપમાન વચ્ચે 13 થી 14 ડિગ્રીનો મોટો ફરક જોવા મળી રહ્યો છે. જેના કારણે લોકોને બેવડી ઋતુનો સામનો કરવો પડી રહ્યો છે. રાજ્યના કેટલાક શહેરોમાં તો ગરમીનો પારો 40 ડિગ્રીને પાર કરી ગયો છે.