ધર્મેન્દ્રના મૃત્યુના ખોટા સમાચારથી ભડકી હેમા માલિની: ‘આ અપમાનજનક છે, પરિવારની ગોપનીયતાનું સન્માન કરો!'

Dharmendra health update: બોલિવુડના 'હી-મેન' તરીકે જાણીતા અભિનેતા ધર્મેન્દ્રની આરોગ્ય વિષયક ચિંતાઓ વચ્ચે સોશિયલ મીડિયા અને કેટલાક ન્યૂઝ ચેનલ્સ પર તેમના મૃત્યુની ખોટી અફવાઓ ફેલાઈ ગઈ. આ અફવાઓથી ભડકીને તેમની પત્ની અને મથુરા સાંસદ હેમા માલિનીએ મંગળવારે X પર પોસ્ટ કરીને તીખી નારાજગી વ્યક્ત કરી. તેમણે આવી અફવાઓને 'ગેરજવાબદારી' અને અપમાનજનક ગણાવી, જે પરિવારના દુઃખને વધારે છે.

89 વર્ષીય ધર્મેન્દ્રને શ્વાસ લેવામાં તકલીફની ફરિયાદ પછી 10 નવેમ્બર 2025ના રોજ મુંબઈના જાણીતા બ્રીચ કેન્ડી હોસ્પિટલમાં દાખલ કરવામાં આવ્યા હતા. તેમના પરિવારજનો, જેમાં પુત્રો સની દેવોલ અને બોબી દેવોલ તથા પત્ની હેમા માલિની સહિતના સભ્યો સામેલ છે, તેઓ હોસ્પિટલમાં તેમની સાથે છે. બોલિવુડના અન્ય સ્ટાર્સ જેમ કે સલમાન ખાન, શાહરુખ ખાન અને ગોવિંદ પણ તેમની મુલાકાત લેવા પહોંચ્યા હતા, જે આરોગ્ય વિષયક ચિંતા વધારી દીધી.

ગઇ કાલથી જ એક્સ, ઈન્સ્ટાગ્રામ અને અન્ય પ્લેટફોર્મ્સ પર ધર્મેન્દ્રના મૃત્યુની અફવાઓ વાયરલ થવા લાગી. કેટલાક લોકો તો તેમને શ્રદ્ધાંજલિ આપવા પણ લાગ્યા. મંગળવાર સવારે 8.30 વાગ્યાની આસપાસ એક મુખ્ય ન્યૂઝ ચેનલે તેમના મૃત્યુની બ્રેકિંગ ન્યૂઝ ચલાવી, જેનાથી વ્યાપક અફરાતફરી મચી. આનો વિરોધ કરતાં હેમા માલિનીએ X પર લખ્યું: "જે થઈ રહ્યું છે તે માફ કરી શકાય તેમ નથી! જવાબદાર ચેનલ્સ કેવી રીતે એવા વ્યક્તિ વિશે ખોટી ખબરો ફેલાવી શકે જે સારવારને સારો રિસ્પોન્સ આપી રહ્યા છે અને ધીમે ધીમે સુધરી રહ્યા છે. આ અત્યંત અપમાનજનક અને ગેરજવાબદારી છે. કૃપા કરીને પરિવાર અને તેની ગોપનીયતાનું સન્માન કરો."

આ પહેલાં તેમની પુત્રી ઈશા દેવોલે પણ ઈન્સ્ટાગ્રામ પર સ્ટેટમેન્ટ જાહેર કરીને કહ્યું કે, "મીડિયા ફેલાવી રહ્યું છે ખોટી ખબરો. મારા પિતા સ્થિર છે અને સુધરી રહ્યા છે. પરિવારને ગોપનીયતા આપો અને પ્રાર્થના કરો." ઈશાએ કોમેન્ટ્સ પણ બંધ કરી દીધા હતા. પરિવારની તરફથી સતત અપડેટ્સ આપવા છતાં આવી અફવાઓ ફેલાવવી અનૈતિક છે, તેમ જણાવ્યું છે.