અમેરિકાના H-1B વિઝા ફી વધારા પર ભારતની ચિંતા: 300,000 ભારતીયો પર થશે અસર

H1B visa: ભારતે અમેરિકાના H-1B વિઝાની ફીમાં થયેલા જંગી વધારા પર પોતાની ચિંતા વ્યક્ત કરી છે, જેને કારણે લાખો ભારતીય પ્રોફેશનલ્સ અને તેમના પરિવારો પર સીધી અસર થશે. ભારતના વિદેશ મંત્રાલયના પ્રવક્તા રણધીર જયસ્વાલે જણાવ્યું છે કે આ નિર્ણયનું મૂલ્યાંકન કરવામાં આવી રહ્યું છે અને આશા છે કે આ મુદ્દાનો ઉકેલ આવશે.

H-1B વિઝા: શું છે આખો મામલો?

યુએસ પ્રમુખ ડોનાલ્ડ ટ્રમ્પે શનિવારે (સપ્ટેમ્બર 21) H-1B વિઝા ફીમાં વધારો કરતા આદેશ પર હસ્તાક્ષર કર્યા છે. આ નવા નિયમો તાત્કાલિક અમલમાં આવ્યા છે. આ નિર્ણયથી આશરે 300,000 ભારતીયોને અસર થવાનો અંદાજ છે, જેમાંથી મોટાભાગના ટેકનિકલ ક્ષેત્રમાં કામ કરી રહ્યા છે.

અમેરિકા દર વર્ષે લોટરી દ્વારા 85,000 H-1B વિઝા જારી કરે છે. આ વિઝાનો સૌથી વધુ ઉપયોગ ભારતીયો દ્વારા થાય છે, જેમાં તેમનો હિસ્સો 72 ટકા જેટલો છે.

ફીમાં 50 ગણો વધારો

અગાઉ, આ વિઝા માટેની ફી 3 વર્ષ માટે $5,000 (અંદાજે 5 લાખ રૂપિયા) હતી. ત્યારબાદ, રિન્યુઅલ માટે પણ આટલી જ ફી ચૂકવવી પડતી હતી. હવે, નવા નિયમ અનુસાર, અમેરિકા વાર્ષિક $100,000 (અંદાજે 88 લાખ રૂપિયા) ફી વસૂલશે. આ રીતે, 6 વર્ષ માટે વિઝાનો ખર્ચ $600,000 (અંદાજે 5.28 કરોડ રૂપિયા) થશે. આ વધારો અગાઉની ફી કરતાં 50 ગણો વધુ છે.

ભારતના વિદેશ મંત્રાલયે જણાવ્યું છે કે આ નિર્ણય ઘણા પરિવારો માટે મુશ્કેલીઓ ઊભી કરી શકે છે. સરકાર આશા રાખે છે કે અમેરિકા ટૂંક સમયમાં આ મામલે યોગ્ય ઉકેલ શોધશે.