India-EU FTA: ભારત અને યુરોપ વચ્ચે ઐતિહાસિક 'ડીલ' ફાઈનલ! PM મોદી આજે કરશે મોટી જાહેરાત, જાણો ક્યારથી લાગુ થશે FTA?

India-EU FTA: ભારત અને યુરોપીય સંઘ (EU) વચ્ચે વેપાર સંબંધોને લઈને એક ખૂબ જ મોટા અને મહત્વના સમાચાર સામે આવ્યા છે. બંને પક્ષો વચ્ચે લાંબા સમયથી ચાલી રહેલી પ્રસ્તાવિત મુક્ત વેપાર કરાર (FTA) માટેની વાતચીત હવે સફળતાપૂર્વક પૂર્ણ થઈ ગઈ છે. આ મેગા ડીલને આખરી ઓપ આપી દેવામાં આવ્યો છે અને આજે મંગળવારે યોજાનારી ભારત-યુરોપીય સંઘ શિખર મંત્રણામાં તેની સત્તાવાર ઐતિહાસિક જાહેરાત કરવામાં આવશે.

PM મોદી કરશે ઐતિહાસિક જાહેરાત

આજે યોજાનારી આ મહત્વપૂર્ણ શિખર મંત્રણામાં પ્રધાનમંત્રી નરેન્દ્ર મોદી યજમાન તરીકે યુરોપીય આયોગના અધ્યક્ષ ઉર્સુલા વોન ડેર લેયેન અને યુરોપીય પરિષદના અધ્યક્ષ એન્ટોનિયો કોસ્ટાનું સ્વાગત કરશે. વાણિજ્ય સચિવ રાજેશ અગ્રવાલે સોમવારે આ અંગે માહિતી આપતા જણાવ્યું હતું કે, ભારત અને EU બંનેએ આ ડીલને ફાઈનલ કરી દીધી છે. ભારતની દ્રષ્ટિએ જોઈએ તો આ વ્યાપાર સમજૂતી ખૂબ જ સંતુલિત અને ભવિષ્યને ધ્યાનમાં રાખીને તૈયાર કરવામાં આવી છે. અગ્રવાલે વિશ્વાસ વ્યક્ત કર્યો છે કે આ કરારથી યુરોપીય સંઘ સાથે ભારતનું આર્થિક જોડાણ મજબૂત થશે અને બંને અર્થવ્યવસ્થાઓમાં વેપાર અને રોકાણને એક નવી ગતિ મળશે.

ક્યારે લાગુ થશે આ નવો કરાર?

આ સમાચાર બાદ સૌથી મોટો પ્રશ્ન એ છે કે આ કરાર ક્યારથી અમલમાં આવશે? આ અંગે સ્પષ્ટતા કરતા વાણિજ્ય સચિવે કહ્યું હતું કે, "અત્યારે આ સમજૂતીના ડ્રાફ્ટની કાયદાકીય તપાસ (Legal Scrubbing) ચાલી રહી છે. સરકારનો પ્રયાસ છે કે આ પ્રક્રિયા જલ્દી પૂરી કરીને કરાર પર સહી-સિક્કા કરી દેવામાં આવે."

સરકારને આશા છે કે આ વર્ષે જ કરાર પર હસ્તાક્ષર થઈ જશે અને આવતા વર્ષની શરૂઆતથી આ નવો FTA પ્રભાવી એટલે કે લાગુ થઈ શકે છે. આ માત્ર વેપાર પૂરતું સીમિત નથી, પરંતુ આ FTA દ્વારા મંગળવારે ભારત અને યુરોપીય સંઘ એક સ્ટ્રેટેજિક ડિફેન્સ ડીલ (રણનીતિક સંરક્ષણ સમજૂતી) અને પ્રવાસીઓની સરળ અવરજવરને પણ આખરી ઓપ આપશે. વોશિંગ્ટનની નીતિઓને કારણે ઊભી થયેલી વૈશ્વિક અસ્થિરતા વચ્ચે આ બેઠક વેપાર અને સુરક્ષા બંને માટે ખૂબ મહત્વની સાબિત થશે.

સુરક્ષા અને ડિફેન્સ પાર્ટનરશિપ પર પણ ફોકસ