UNSCમાં ભારતે પાકિસ્તાનને બતાવી ખરી ઔકાત, આતંકવાદને પ્રોત્સાહન આપનારાઓને ચૂકવવી પડશે કિંમત

ભારતે યુનાઇટેડ નેશન્સ સિક્યોરિટી કાઉન્સિલ (UNSC)માં પાકિસ્તાનને આંતરરાષ્ટ્રીય મંચ પર ઝાટકી કાઢ્યું. ભારતે પાકિસ્તાનને કટ્ટરપંથ અને આતંકવાદમાં ડૂબેલો દેશ ગણાવીને સ્પષ્ટ શબ્દોમાં ચેતવણી આપી કે સરહદ પાર આતંકવાદ ફેલાવવાની ભારે કિંમત ચૂકવવી પડશે. આ બોલ્ડ નિવેદનથી અન્ય દેશો પણ આશ્ચર્યમાં પડી ગયા.

પાકિસ્તાનની અધ્યક્ષતામાં જ લગાવી ઝાટકણી

આ ઘટના UNSCની તે બેઠકમાં બની જેની અધ્યક્ષતા પાકિસ્તાન પોતે કરી રહ્યું હતું. ભારતે કડક શબ્દોમાં કહ્યું કે, "જે દેશો સરહદ પાર આતંકવાદને પ્રોત્સાહન આપે છે, તેઓએ તેની ગંભીર કિંમત ચૂકવવી પડશે." ભારતે પાકિસ્તાનને કટ્ટરપંથ અને આતંકવાદમાં ડૂબેલું સીરિયલ ઉધાર લેનાર દેશ ગણાવ્યું.

આતંકવાદ સામે ઝીરો ટોલરન્સની વાત

યુનાઇટેડ નેશન્સમાં ભારતના સ્થાયી પ્રતિનિધિ હરીશ પરવતનેનીએ કહ્યું, "જ્યારે આપણે આંતરરાષ્ટ્રીય શાંતિ અને સુરક્ષાની વાત કરીએ છીએ, ત્યારે કેટલાક મૂળભૂત સિદ્ધાંતોનું વૈશ્વિક સ્તરે સન્માન થવું જોઈએ, જેમાં આતંકવાદ સામે ઝીરો ટોલરન્સનો સમાવેશ થાય છે." આ નિવેદન UNSCની ઉચ્ચ-સ્તરીય ખુલ્લી ચર્ચામાં આપવામાં આવ્યું, જેનો વિષય હતો બહુપક્ષીય વ્યવસ્થા અને શાંતિપૂર્ણ સમાધાન દ્વારા આંતરરાષ્ટ્રીય શાંતિ અને સુરક્ષાને પ્રોત્સાહન. જુલાઈ મહિનાથી આ 15 સભ્યોની કાઉન્સિલની અધ્યક્ષતા પાકિસ્તાન કરી રહ્યું છે.

પાકિસ્તાને ઉઠાવ્યો જમ્મુ-કાશ્મીર અને સિંધુનો મુદ્દો

બેઠક દરમિયાન પાકિસ્તાનના ઉપ વડાપ્રધાન અને વિદેશ મંત્રી ઇશાક ડારે જમ્મુ-કાશ્મીર અને સિંધુ જળ સંધિનો મુદ્દો ઉઠાવ્યો. ભારતે આનો સખત જવાબ આપ્યો, જેનાથી પાકિસ્તાન નિ:શબ્દ થઈ ગયું.