India US Tension: અમેરિકાએ ભારતની વેપાર નીતિ પર ફેંક્યો બોમ્બ, USને નડતા ગણાવ્યા તમામ પોઇન્ટ

India US Tension: અમેરિકી વાણિજ્ય મંત્રી હોવર્ડ લુટનિકે ભારતની વ્યાપાર નીતિઓ પર તીખી ટીકા કરી છે. તેમણે એક્સિઓસ સાથેની વાતચીતમાં જણાવ્યું કે ભારત વૈશ્વિક વેપારનો લાભ તો લઈ રહ્યું છે, પરંતુ પોતાનું બજાર ખોલવામાં આનાકાની કરે છે. લુટનિકે ભારતના સંરક્ષણવાદી અભિગમ પર સવાલ ઉઠાવ્યા અને કહ્યું કે આનાથી અમેરિકી બિઝનેસને નુકસાન થઈ રહ્યું છે.

અમેરિકી મકાઈની ખરીદી પર સવાલ

લુટનિકે ખાસ કરીને ભારતની 1.4 અબજની વસ્તીનો ઉલ્લેખ કરતાં કહ્યું, “ભારત પોતાની વિશાળ વસ્તીની વાત તો કરે છે, પરંતુ અમેરિકાથી મકાઈ જેવા કૃષિ ઉત્પાદનો ખરીદવામાં રસ નથી બતાવતું.” તેમણે ઉમેર્યું, “ભારત દરેક ચીજ પર ટેરિફ લગાવે છે, જેનાથી વેપારમાં અસમાનતા સર્જાય છે.” લુટનિકના મતે, અમેરિકા ભારતીય ચીજવસ્તુઓ સરળતાથી ખરીદે છે, પરંતુ ભારત અમેરિકી ઉત્પાદનોની ખરીદીમાં અડચણો ઊભી કરે છે.

રૂસથી તેલ ખરીદી પર ચિંતા

અમેરિકી મંત્રીએ રૂસથી ભારતની સસ્તા તેલની ખરીદી પર પણ ચિંતા વ્યક્ત કરી. આ ખરીદી પશ્ચિમી દેશોના રૂસ પરના પ્રતિબંધોની વચ્ચે વિવાદનું કારણ બની છે. લુટનિકે સ્વીકાર્યું કે ભારતને વિકાસ માટે સસ્તી ઊર્જાની જરૂર છે, પરંતુ આ ખરીદી વૈશ્વિક વેપારમાં અસંતુલન દર્શાવે છે.

રણનીતિક સહયોગ છતાં વિવાદ

આ ટીકાઓ છતાં, ભારત અને અમેરિકા રક્ષા, ટેક્નોલોજી અને રોકાણના ક્ષેત્રે મજબૂત ભાગીદાર છે. લુટનિકે કહ્યું કે વોશિંગ્ટન નવી દિલ્હી સાથેના સંબંધોને ઘટાડવા નહીં માંગે, પરંતુ વેપારના મુદ્દાઓ યથાવત રહેશે. ગયા અઠવાડિયે ભારતમાં અમેરિકી રાજદૂત તરીકે નામાંકિત સર્જિયો ગોરે જણાવ્યું હતું કે બંને દેશો વચ્ચે વેપાર સમજૂતી ટૂંક સમયમાં થઈ શકે છે. તેમણે ઉમેર્યું કે અમેરિકી રાષ્ટ્રપતિ ડોનાલ્ડ ટ્રમ્પે ભારતીય વાણિજ્ય મંત્રાલયના પ્રતિનિધિમંડળને આગામી સપ્તાહે અમેરિકા આવવાનું આમંત્રણ આપ્યું છે.