India Defense Export: ઇન્ડોનેશિયા ભારત પાસેથી બ્રહ્મોસ મિસાઇલ ખરીદશે, 450 મિલિયન ડોલરનો મોટો સોદો ફાઇનલ, ચીનને ચેતવણી!

India Defense Export: દક્ષિણ એશિયાના સૌથી ખતરનાક હથિયારોમાંનું એક બ્રહ્મોસ સુપરસોનિક ક્રુઝ મિસાઇલ હવે વિશ્વના સૌથી મોટા મુસ્લિમ બહુમતીવાળા દેશ ઇન્ડોનેશિયાના હાથમાં આવવાની તૈયારીમાં છે. ભારત સાથેનો આ લગભગ $450 મિલિયનનો સોદો ટૂંક સમયમાં અંતિમ સ્વરૂપ લેશે.

મે 2025માં થયેલા ઓપરેશન સિંદૂર દરમિયાન ભારતીય વાયુસેનાએ આ મિસાઇલનો ઉપયોગ કરી પાકિસ્તાનના એરબેઝ પર હુમલો કર્યો હતો. આ હુમલાએ પાકિસ્તાનની હવાઈ શક્તિને ખાસ્સું નુકસાન પહોંચાડ્યું હતું. હવે એ જ મિસાઇલ ઇન્ડોનેશિયાની નૌકાદળને મજબૂત કરશે અને દક્ષિણ ચીન સમુદ્રમાં ચીનના વિસ્તારવાદી દાવાઓ સામે મજબૂત જવાબ આપવામાં મદદ કરશે.

ડીલની વિગતો

સૂત્રોના જણાવ્યા અનુસાર, ભારત અને ઇન્ડોનેશિયા વચ્ચેની વાટાઘાટો લગભગ પૂરી થઈ ગઈ છે. ફક્ત રશિયાની અંતિમ મંજૂરીની રાહ છે, કારણ કે બ્રહ્મોસ ભારત-રશિયાનું સંયુક્ત ઉત્પાદન છે. આ વર્ષે જાન્યુઆરીમાં ઇન્ડોનેશિયાના રાષ્ટ્રપતિ પ્રબોવો સુબિયાંતોની નવી દિલ્હી મુલાકાત દરમિયાન આ મુદ્દે વિસ્તૃત ચર્ચા થઈ હતી.

તાજેતરમાં ભારતના ચીફ ઓફ ડિફેન્સ સ્ટાફ (CDS) જનરલ અનિલ ચૌહાણની ઇન્ડોનેશિયા મુલાકાતે પણ આ સહકારને નવો વેગ આપ્યો છે. બંને દેશો વચ્ચે સંરક્ષણ સંબંધો ઝડપથી મજબૂત થઈ રહ્યા છે.

ફિલિપાઇન્સ પછી ઇન્ડોનેશિયા

ભારતે પહેલેથી જ ફિલિપાઇન્સને રૂપિયા 3500 કરોડની બ્રહ્મોસ મિસાઇલ સપ્લાય કરી છે. આ સોદામાં માત્ર મિસાઇલ જ નહીં, પણ લોન્ચર અને સપોર્ટ સિસ્ટમ પણ આપવામાં આવી હતી. ફિલિપાઇન્સે આ મિસાઇલનો ઉપયોગ દક્ષિણ ચીન સમુદ્રમાં પોતાના હિતોના રક્ષણ માટે કરવાનું નક્કી કર્યું છે. આ જ પ્રકારનો સોદો હવે ઇન્ડોનેશિયા સાથે થવાની નજીક છે, જે ભારતની સંરક્ષણ નિકાસને નવી ઊંચાઈએ લઈ જશે.