Ather Energy Report 2025: ભારતમાં ઇલેક્ટ્રિક વાહનો (EV)નો ક્રેઝ સતત વધી રહ્યો છે. હવે ટુ-વ્હીલર માત્ર એક વાહન નથી રહ્યું, પરંતુ એક સ્માર્ટ ગેજેટ બની ગયું છે. ઇલેક્ટ્રિક ટુ-વ્હીલર બનાવતી જાણીતી કંપની એથર એનર્જી (Ather Energy) એ હાલમાં જ 2025 યર-એન્ડ રાઈડિંગ ઇનસાઇટ્સ નામનો એક રિપોર્ટ જાહેર કર્યો છે. આ રિપોર્ટમાં ભારતીય રાઈડર્સની ડ્રાઈવિંગ કરવાની રીતભાત વિશે ખૂબ જ રસપ્રદ માહિતી સામે આવી છે.
ગજબ! કોલકાતાના EV રાઈડર્સ હોર્ન વગાડવામાં નંબર 1, તો બ્રેક મારવામાં આ શહેર સૌથી આગળ, જાણો રસપ્રદ રિપોર્ટ
Ather Energy Report 2025: કોલકાતાના EV ચાલકો કલાકમાં 131 વખત હોર્ન વગાડે છે! એથર એનર્જીના લેટેસ્ટ રિપોર્ટમાં ભારતીય રાઈડર્સની અનોખી આદતો અને સ્માર્ટ ફીચર્સના ઉપયોગ વિશે ચોંકાવનારા ખુલાસા થયા છે.
MoneyControl Newsઅપડેટેડ Jan 15, 2026 પર 1:42 PM
દેશભરમાં એથરના 5 લાખથી વધુ કનેક્ટેડ સ્કૂટર્સના ડેટા પરથી આ રિપોર્ટ તૈયાર કરવામાં આવ્યો છે, જે સાબિત કરે છે કે ભારતનું EV માર્કેટ હવે માત્ર હાર્ડવેર પૂરતું સીમિત નથી, પરંતુ સોફ્ટવેર આધારિત બની ગયું છે.
કોલકાતામાં હોર્નનો સૌથી વધુ ઘોંઘાટ
રિપોર્ટના આંકડા મુજબ, કોલકાતા ના ઇલેક્ટ્રિક ટુ-વ્હીલર ચાલકો હોર્ન વગાડવામાં દેશમાં સૌથી આગળ છે. અહીં સરેરાશ એક કલાકમાં રાઈડર્સ 131 વખત હોર્ન વગાડે છે! આ આંકડો ત્યાંના ગીચ ટ્રાફિક અને થોડી આક્રમક ડ્રાઈવિંગ સ્ટાઈલ તરફ ઈશારો કરે છે.
બેંગલુરુમાં પેનિક બ્રેકિંગ સૌથી વધુ
બીજી તરફ, બેંગલુરુ ના રાઈડર્સ બ્રેકનો ઉપયોગ કરવામાં આગળ છે. મુંબઈની સરખામણીમાં બેંગલુરુમાં ચાલકો લગભગ 4 ગણી વધુ વખત પેનિક બ્રેકિંગ (અચાનક બ્રેક મારવી) કરે છે. આનું મુખ્ય કારણ ત્યાંનું અનિશ્ચિત ટ્રાફિક અને વારંવાર વાહન રોકવાની ફરજ પડતી હોય તેવી સ્થિતિ છે.
જોકે, પુણે અને હૈદરાબાદ જેવા શહેરોમાં લોકો પ્રમાણમાં શાંતિથી વાહન ચલાવે છે. અહીં રાઈડિંગનું વાતાવરણ કંટ્રોલ અને શિસ્તબદ્ધ જોવા મળ્યું છે. દક્ષિણ ભારતના નાના શહેરોમાં પણ ડ્રાઈવિંગ પેટર્ન સ્થિર જોવા મળી છે.
સોફ્ટવેર બન્યું મુસાફરીનો હિસ્સો
એથરના ચીફ બિઝનેસ ઓફિસર, રવનીત ફોકેલાએ જણાવ્યું હતું કે, "અમારો ડેટા દર્શાવે છે કે હવે સોફ્ટવેર એ લોકોની રોજિંદી મુસાફરીનો એક એક્ટિવ ભાગ બની ગયો છે." પહેલા રિયલ-ટાઈમ ડેટા મળવો મુશ્કેલ હતો, પરંતુ હવે કનેક્ટેડ ફીચર્સને કારણે રાઈડર્સ રસ્તાની સ્થિતિ મુજબ વધુ સારી રીતે ડ્રાઈવિંગ કરી શકે છે અને પોતાની સુરક્ષાનું ધ્યાન રાખી શકે છે.
સુરક્ષા અને સ્માર્ટ ફીચર્સનો વધતો ક્રેઝ
ગ્રાહકો હવે સ્માર્ટ ફીચર્સને માત્ર શોખ માટે નહીં પણ જરૂરિયાત તરીકે જુએ છે. નાણાકીય વર્ષ 2025ના બીજા ક્વાર્ટરમાં 88% ગ્રાહકોએ એથરનું કનેક્ટેડ સોફ્ટવેર AtherStack Pro ખરીદ્યું છે. એથરનું ‘FallSafe’ સિસ્ટમ (જે સ્કૂટર પડી જાય ત્યારે મોટર ઓટોમેટિક બંધ કરી દે છે) મુંબઈ અને બેંગલુરુમાં ઓછું વપરાયું, જ્યારે દિલ્હી અને હૈદરાબાદમાં આ ફીચરનો ઉપયોગ વધુ જોવા મળ્યો છે.
સ્કૂટરની સ્ક્રીન પર ક્રિકેટ સ્કોર!
આ રિપોર્ટમાં એક મજેદાર વાત એ પણ સામે આવી છે કે કનેક્ટેડ ફીચર્સ માત્ર રસ્તો બતાવવા માટે નથી. મહિલા ક્રિકેટ વર્લ્ડ કપની ફાઈનલ મેચ દરમિયાન 31,000થી વધુ રાઈડર્સે પોતાના સ્કૂટરના ડેશબોર્ડ પર લાઈવ સ્કોર જોયો હતો! ઉપરાંત, આગ્રા, કોટા અને નવી દિલ્હી જેવા શહેરોમાં લોકોએ લાઈવ લોકેશન શેરિંગ ફીચરનો ઉપયોગ નાના શહેરો કરતા 2થી 3 ગણો વધારે કર્યો હતો. આમ, આ રિપોર્ટ સ્પષ્ટ કરે છે કે ભારતમાં હવે વાહનો માત્ર એક જગ્યાએથી બીજી જગ્યાએ જવા માટેનું સાધન નથી રહ્યા, પરંતુ તે લોકોની લાઈફસ્ટાઈલ અને ટેકનોલોજી સાથે પણ જોડાઈ ગયા છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.