ગુજરાતમાં મેઘતાંડવનું સંકટ! હવામાન વિભાગનું ભયંકર રેડ એલર્ટ, જાણો અમદાવાદથી સુરત સુધી આગામી 5 દિવસ કેવો પડશે વરસાદ

Gujarat weather forecast: છેલ્લા 2 દિવસથી ગુજરાતમાં મેઘરાજાએ જાણે રૌદ્ર સ્વરૂપ ધારણ કર્યું છે. સતત વરસી રહેલા મુશળધાર વરસાદને કારણે જનજીવન સંપૂર્ણપણે અસ્તવ્યસ્ત થઈ ગયું છે. ખાસ કરીને દક્ષિણ અને મધ્ય ગુજરાતના અનેક વિસ્તારોમાં જળબંબાકાર અને પૂર જેવી ભયાનક સ્થિતિ સર્જાઈ છે. જો તમે એવું વિચારતા હોવ કે હવે વરસાદથી રાહત મળશે, તો હજુ સાવધાન રહેવાની જરૂર છે! ભારતીય હવામાન વિભાગ એ આગામી 29 જુલાઈ સુધી રાજ્યમાં ભારેથી અતિભારે વરસાદની ચેતવણી આપી છે.

હવામાન વિભાગના લેટેસ્ટ અપડેટ મુજબ, અરબી સમુદ્ર અને બંગાળની ખાડીમાં એકસાથે અનેક સિસ્ટમ સક્રિય થવાને કારણે ગુજરાત પર મોટી આફત તોળાઈ રહી છે. ચાલો જાણીએ આગામી દિવસોમાં કયા જિલ્લામાં કેવો વરસાદ પડશે.

24 થી 29 જુલાઈ સુધીની તારીખવાર વરસાદની આગાહી:

24 જુલાઈ (શુક્રવાર): પંચમહાલ, દાહોદ અને મહીસાગર જિલ્લામાં અત્યંત ભારે વરસાદનું 'રેડ એલર્ટ' આપવામાં આવ્યું છે. જ્યારે અમદાવાદ, સુરત, ગાંધીનગર, સાબરકાંઠા, અરવલ્લી, ખેડા, આણંદ, વડોદરા, છોટાઉદેપુર, ભરૂચ, નવસારી, વલસાડ, દમણ, દાદરા નગર હવેલી અને સુરેન્દ્રનગરમાં 'ઓરેન્જ એલર્ટ' જાહેર કરાયું છે. ઉત્તર ગુજરાત અને સૌરાષ્ટ્રના બાકીના વિસ્તારોમાં યલો એલર્ટ છે.

25 જુલાઈ (શનિવાર): સાબરકાંઠા અને અરવલ્લી જિલ્લામાં અતિભારે વરસાદની શક્યતા સાથે 'ઓરેન્જ એલર્ટ' છે. રાજ્યના અન્ય ભાગોમાં 30 થી 40 kmph ની ઝડપે પવન ફૂંકાવા અને વીજળીના કડાકા સાથે મધ્યમથી ભારે વરસાદનું ‘યલો એલર્ટ' છે.

26 જુલાઈ (રવિવાર): સાબરકાંઠા અને બનાસકાંઠામાં વરસાદનું જોર યથાવત રહેશે અને ત્યાં 'ઓરેન્જ એલર્ટ' અપાયું છે. બાકીના તમામ જિલ્લાઓમાં ગાજવીજ અને પવન સાથે હળવાથી મધ્યમ વરસાદ પડી શકે છે.

27 જુલાઈ (સોમવાર): ઉત્તર ગુજરાતના બનાસકાંઠા, વાવ-થરાદ, પાટણ, મહેસાણા અને સાબરકાંઠામાં ભારે વરસાદ પડવાની સંભાવના છે (યલો એલર્ટ). જ્યારે બાકીના ગુજરાતમાં માત્ર હળવા વરસાદી ઝાપટાં જ પડશે.