નેપાળ પર કુદરતનો બેવડો માર: વિનાશક પૂર બાદ 5ની તીવ્રતાનો ભૂકંપ, પૂરમાં અત્યાર સુધી 1366 લોકોના મોત અને 4000થી વધુ લાપતા

Nepal Flood Updates: નેપાળ અત્યારે એક અત્યંત ગંભીર માનવીય સંકટમાંથી પસાર થઈ રહ્યું છે. કુદરત જાણે નેપાળ પર રૂઠી હોય તેમ, પહેલા વિનાશક પૂર અને હવે ભૂકંપના આંચકાઓએ લોકોને ડરાવી દીધા છે.

ઉત્તર-પશ્ચિમ નેપાળમાં ભૂકંપના આંચકા

નેશનલ સેન્ટર ઓફ સીસ્મોલોજીના લેટેસ્ટ આંકડા મુજબ, ઉત્તર-પશ્ચિમ નેપાળમાં રાત્રે 9:38 વાગ્યે ભૂકંપના આંચકા અનુભવાયા હતા. રિક્ટર સ્કેલ પર આ ભૂકંપની તીવ્રતા 5.0 નોંધાઈ છે. આ ભૂકંપનું કેન્દ્ર 29.022° N અને 83.978° E દેશાંતર પર, જમીનથી 143 કિલોમીટર નીચે હતું. સારી વાત એ છે કે ભૂકંપનું કેન્દ્ર જમીનમાં ઘણું ઊંડે હોવાથી સપાટી પર તેની કોઈ ખાસ અસર જોવા મળી નથી. હાલમાં પ્રશાસન દ્વારા સ્થિતિની સમીક્ષા કરવામાં આવી રહી છે અને હજુ સુધી કોઈ જાનમાલના નુકસાનના સમાચાર નથી.

ભોટે કોશી નદીના પૂરનો કહેર: 15મા દિવસે પણ શોધખોળ ચાલુ

ભૂકંપની ઘટના એવા સમયે બની છે જ્યારે નેપાળ પહેલાથી જ ભોટે કોશી નદીમાં આવેલા ભયાનક પૂરની તારાજી સામે લડી રહ્યું છે. પૂર આવ્યા બાદ બચાવ અને શોધખોળ અભિયાન આજે 15મા દિવસે પણ ચાલુ છે. નેપાળ પોલીસના રાત્રે 8 વાગ્યા સુધીના રિપોર્ટ મુજબ, સ્થિતિ ખૂબ જ ચિંતાજનક છે.

પૂરથી થયેલા નુકસાનના ચોંકાવનારા આંકડા:

મૃતકોની સંખ્યા: અત્યાર સુધીમાં 1366 લોકોના કમકમાટીભર્યા મોતના સમાચાર સામે આવ્યા છે.